ٹوتھ پیسٹ دانتوں کے علاوہ بھی فائدہ مند !

دانتوں کی صفائی اور سفیدی کے لیے ٹوتھ پیسٹ کا استعمال تو بہت عام ہے جو انہیں مضبوط بنانا ہے ہیں اور صاف ستھرا بھی رکھتا ہے لیکن کیا آپ کو معلوم ہے کہ ٹوتھ پیسٹ آپ کے چہرے کو دانوں سے نجات بھی دلا سکتا ہے؟ آپ کو یقینا یہ بات بڑی عجیب لگی ہو گی لیکن یہ حقیقت ہے کہ واقعی ٹوتھ پیسٹ بہت کچھ ایسا بھی کرسکتا ہے جس کا آپ نے کبھی تصور بھی نہیں کیا ہو گا۔ ٹوتھ پیسٹ دانتوں سے ہٹ کر بھی کافی چیزیں صاف کرنے کی صلاحیت رکھتا ہے۔ ٹوتھ پیسٹ کے ایسے ہی چند انوکھے طریقہ ہائے استعمال، آپ کو حیران کرکے رکھ دیں گے۔
ہاتھوں کو بو سے نجات دلانا : پیاز یا لہسن کو کاٹنے کے بعد ہاتھوں میں ، بو دھونے کے بعد بھی باقی رہتی ہے اور عام صابن بھی اس سے نجات دلانے میں ناکام رہتے ہیں لیکن اگر آپ تھوڑی سی مقدار میں ٹوتھ پیسٹ کو ہتھیلی پر مل لیں تو اس بو سے مختصر وقت میں آپ مو¿ثر طریقے سے جان چھڑا سکتے ہیں۔
زیورات کی صفائی : سونے یا چاندی کے زیورات کو کسی سنار کے پاس لے جا کر بہت زیادہ پیسہ خرچ کر کے ان کی صفائی کروانے سے بہتر ہے کہ آپ ٹوتھ پیسٹ کو آزما کر دیکھیں، بس ٹوتھ پیسٹ کی تھوڑی سی مقدار زیورات کے اوپر لگا کر انہیں اپنی انگلیوں کی پوروں سے رگڑیں پھر اسے کپڑے کے کسی ٹکڑے سے صاف کردیں۔ زیورات چمک اٹھیں گے۔
دیوار سے رنگوں کے داغ کا خاتمہ: بچوں کو عام طور پر دیواروں پر پینٹ کرنے کا بہت زیادہ شوق ہوتا ہے جو ماﺅں کے لیے گھروں کی صفائی کے دوران بہت بڑا چیلنج بھی بن جاتا ہے، اس سلسلے میں بھی ٹوتھ پیسٹ زبردست کمال دکھاتا ہے بس ٹوتھ پیسٹ کو ان پر رگڑ کر کپڑے سے داغ والی جگہ صاف کردیں، آپ کو لگے گا کہ جیسے یہاں کبھی کوئی داغ تھا ہی نہیں۔
سپورٹس گلاسز کی صفائی : سپورٹس گلاسز کا بہت زیادہ اور دیر تک استعمال ان کے شیشوں کو دھندلا دیتا ہے اور وہ گندے بھی ہوجاتے ہیں جن کی صفائی پانی کے بس میں نہیں ہوتی لیکن یہاں ٹوتھ پیسٹ اپنا کمال دکھاتا ہے۔ اس کی صفائی کے لئے آپ تھوڑا سا ٹوتھ پیسٹ گلاسز پر رگڑیں اور گیلے کپڑے سے پیسٹ کو صاف کردیں، آپ کے گلاسز بالکل نئے جیسے صاف شفاف ہو جائیں گے۔
چہرے کے دانوں یا مہاسوں سے نجات : اگرچہ یہ بات آپ کو بڑی عجیب اور حیران کن لگے گی لیکن حقیقت یہی ہے کہ ٹوتھ پیسٹ کا استعمال چہرے پر ابھر آنے والے دانوں اور مہاسوں سے جلد نجات دلانے کا مو¿ثر ذریعہ ہے۔ تھوڑی سی مقدار میں ٹوتھ پیسٹ مہاسوں سے متاثرہ حصے پر لگائیں، پھر اسے دھولیں، اس کے بعد آپ اس کا اثر دیکھ کر حیران رہ جائیں گے۔
ناخنوں کی حفاظت : ناخنوں کو بھی دانتوں جتنی نگہداشت کی ضرورت ہوتی ہے۔ ٹوتھ پیسٹ دانتوں کی حفاظت تو کرتا ہی ہے لیکن یہ ناخنوں کو بھی صحت مند بناتا ہے۔اپنے ناخنوں کو روزانہ ٹوتھ پیسٹ سے دھونے کی عادت اپنائیں، پھر دیکھیں ناخنوں کی چمک اور ان کی صحت کیسے برقرار رہتی ہے۔
بچوں کی بوتلوں کی صفائی :چونکہ بوتلوں میں اکثر بساند پیدا ہوجاتی ہے جس کو دور کرنے میں عام برتن دھونے کے صابن یا کیمیکل وغیرہ زیادہ مو¿ثر ثابت نہیں ہوتے، ایسے حالات میں ٹوتھ پیسٹ کا استعمال بہت مفید ثابت ہوتا ہے جو بوتلوں میں پیدا ہونے والی بو کو دور کردیتا ہے۔
میز سے کپ کے گول نشانات کی صفائی : ایک اور اہم کام جو ٹوتھ پیسٹ بہت اچھے طریقے سے انجام دیتا ہے وہ شیشے یا لکڑی کی میز پر ٹھنڈے یا چائے وغیرہ کے کپ رکھنے سے بن جانے والے نشانات کو مٹانا ہے۔ یہ نشانات خشک ہونے کے بعد صاف کرنا بہت مشکل ہوتا ہے لیکن ٹوتھ پیسٹ سے یہ کام بہت آسانی سے ہو جاتا ہے۔
قالین سے دھبوں کا خاتمہ: قالینوں پر داغ بہت برے لگتے ہیں اور انہیں صاف کرنا بھی بہت مشکل ہوتا ہے لیکن ٹوتھ پیسٹ سے کارپٹ پر لگے کسی بھی قسم کے داغ سے نجات پانا بہت آسان ہوجاتا ہے۔بس داغ پر کچھ مقدار میں ٹوتھ پیسٹ لگائیں، پھر اسے گیلے تولیے سے صاف کریں، آپ داغ کو آسانی سے صاف ہوتے دیکھ کر حیران رہ جائیں گے۔
شیشے کے دروازوں کو چمکانا: اگر آپ کے گھر میں شیشے کے دروازے لگے ہوئے ہیں تو آپ نے دیکھا ہوگا کہ اکثر وہ دھندلے ہو جاتے ہیں اور صاف کرنے کے بعد بھی گندے نظر آتے ہیں لیکن یہاں بھی ٹوتھ پیسٹ کی مدد سے شیشے کو صاف کرکے آپ انہیں نئے جیسا چمکا سکتے ہیں۔
     ٭٭٭