کٹھن وقت سے نکل آئے، اصلاحات کے ثمرات عوام کو پہنچنا شروع ہو گئے ہیں: فردوس عاشق
اسلام آباد (آئی این پی) معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ کٹھن وقت سے نکل آئے ہیں،حکومتی اصلاحات کے ثمرات عوام کو پہنچنا شروع ہو گئے ہیں، عوامی ترقی اور خوشحالی وزیر اعظم کا نصب العین ہے،احساس کفالت پروگرام کو مہمند کے دور دراز علاقوں تک پہنچایاگیاہے، وزیر اعظم کی قبائلی عوام سے محبت انہیں ترقی کے دھارے میں شامل کرنے کے عزم کا اظہار ہے۔ منگل کو سماجی رابطے کی ویب سائٹ ٹوئٹر پر اپنے بیان میں فردوس عاشق اعوان نے کہا غریبوں اور محروموں کے حقوق کے تحفظ کے لیے اٹھائے گئے یہ عملی اقدامات عمران خان کی پسے ہوئے طبقات سے وابستگی کا ثبوت ہیں۔ وزیراعظم کا احساس ضلعی ترقیاتی پورٹل ڈیٹا فار پاکستان کا اجراء جدید ٹیکنالوجی کے استعمال کے ذریعے ملک میں غربت کے خاتمے اور سماجی تحفظ کے فروغ میں معاون ثابت ہوگا۔اس پورٹل کے ذریعے ملک میں غربت کی شرح کا درست تجزیہ ممکن ہوسکے گا۔وزیراعظم ایسی فلاحی ریاست کے قیام کے خواہاں ہیں جہاں وسائل امراء کی بجائے محروموں پر خرچ ہوں۔ ملکی تاریخ میں پہلی بار مستحق طلباء کو پچاس ہزار سکالرشپ ملیں گے۔وزیراعظم عمران خان نے اپنی جدوجہد مسلسل، محنت اور لگن سے ہمیشہ اپنے مخالفین اور ناقدین کو غلط ثابت کیا۔وہ فرسودہ اور گلے سڑے نظام کو ٹھیک کرنے کیلئے پرعزم ہیں۔
فردوس عاشق