رسول اللہ ﷺ کی 3 دن تک لگاتار ایک ہی صحابی کیلئے جنت کی بشارت، اس کے کس عمل نے اس مرتبے تک پہنچایا
حضرت انس رضی اللہ عنہ سے مروی ہے کہ ایک مرتبہ ہم لوگ نبی اکرم صلی اللہ علیہ وآلہ وسلم کے پاس بیٹھے ہوئے تھے، نبی اکرم صلی اللہ علیہ وآلہ وسلم نے فرمایا ""ابھی تھوڑی دیر کے بعد تمہارے پاس ایک جنتی آئے گا"
دیکھا تو ایک انصاری صحابیؓ چلے آ رہے ہیں جن کی ڈاڑھی سے وضو کے پانی کے قطرات ٹپک رہے ہیں، انہوں نے اپنے بائیں ہاتھ میں اپنی جوتی اٹھا رکھی ہے۔ دوسرے دن بھی نبی اکرم صلی اللہ علیہ وآلہ وسلم نے یہی اعلان کیا اور وہی صحابیؓ آئے۔
تیسرے دن اعلان کیا تب بھی وہی صحابی رضی اللہ عنہ آئے، تیسرے دن جب نبی اکرم صلی اللہ علیہ وآلہ وسلم چلے گئے تو حضرت عبداللہ بن عمرو بن عاصؓ ان صحابیؓ کے پیچھے چلے گئے اور ان سے کہنے لگے کہ میں نے اپنے والد صاحب کو قسمیں دے کر اور بہت اصرار کے بعد اس بات پر آمادہ کیا ہے کہ میں 3 دن تک گھر نہیں جاؤں گا، اگر آپؓ مجھے اپنے یہاں ٹھہرا سکتے ہیں تو آپؓ جو عمل کریں گے میں بھی وہی عمل کروں گا، انہوں نے حضرت عبداللہ بن عمروؓ کو اجازت دے دی۔
حضرت عبداللہ رضی اللہ عنہ بیان کرتے ہیں کہ وہ ان3 راتوں میں ان کے ساتھ رہے لیکن کسی رات انہیں قیام کرتے ہوئے نہیں دیکھا، البتہ اتنا ضرور ہوتا تھا کہ جب وہ سو کر بیدار ہوتے اور بستر سے اٹھتے تو اللہ کا ذکر کرتے ہوئے نماز فجر کے لیے اٹھ جاتے، نیز میں نے انہیں ہمیشہ خیر ہی کی بات کرتے ہوئے دیکھا۔
جب 3 راتیں گذر گئیں اور میں اپنی ساری محنت کو حقیر سمجھنے لگا، تو میں نے ان سے کہا کہ بندہ خدا! میرے اور والد صاحب کے درمیان کوئی ناراضی یا قطع تعلقی نہیں ہے (جس کی وجہ سے میں یہاں رہ پڑا ہوں) لیکن میں نے نبی اکرم صلی اللہ علیہ وآلہ وسلم کو 3 مرتبہ یہ فرماتے ہوئے سنا کہ "ابھی تمہارے پاس ایک جنتی آدمی آئے گا "اور تینوں مرتبہ آپؓ ہی آئے تو مجھے یہ خواہش پیدا ہوئی کہ میں آپؓ کے پاس کچھ وقت گذار کر آپؓ کے اعمال دیکھوں اور خود بھی اس کی اقتداء کروں، لیکن میں نے آپؓ کو اس دوران کوئی بہت زیادہ عمل کرتے ہوئے نہیں دیکھا، پھر آپؓ اس مقام تک کیسے پہنچ گئے کہ نبی اکرم صلی اللہ علیہ وآلہ وسلم نے آپؓ کے متعلق اتنی بڑی بات فرمائی؟
انہوں نے جواب دیا کہ عمل تو وہی ہے جو آپؓ نے دیکھا، پھر جب میں پلٹ کر واپس جانے لگا تو انہوں نے مجھے آواز دے کر بلایا تو کہنے لگے کہ عمل تو وہی ہیں جو آپؓ نے دیکھے، البتہ میں اپنے دل میں کسی مسلمان کے متعلق کوئی کینہ نہیں رکھتا اور کسی مسلمان کو ملنے والی نعمتوں اور خیر پر اس سے حسد نہیں کرتا، حضرت عبداللہ رضی اللہ عنہ نےبیان کیا یہی وہ چیز ہے جس نے آپؓ کو اس درجے تک پہنچایا اور جس کی ہم میں طاقت نہیں ہے۔
(مسند احمد: 12697)
