وزیراعلٰی سے امریکی سفیر کی ملاقات ، پاکستان میں دہشت گردی اور انتہا پسندی کی کوئی گنجائش نہیں ، شہباز شریف

 لاہور(جنرل رپورٹر) وزیراعلیٰ پنجاب محمد شہباز شریف سے پاکستان میں امریکہ کے سفیر ڈیوڈ ہیل نے ملاقات کی جس میں باہمی دلچسپی کے امور، دو طرفہ تعلقات کے فروغ اور مختلف شعبوں خصوصاً توانائی کے شعبہ میں تعاون بڑھانے پر تبادلہ خیال کیا گیا۔ وزیراعلیٰ شہباز شریف نے کیلی فورنیا میں پیش آنے والے دہشت گردی کے بدترین واقعہ کی شدید مذمت کرتے ہوئے کہا کہ معذوروں کے مرکز پر حملے کی جتنی بھی مذمت کی جائے کم ہے۔ہم کیلی فورنیا میں جاں بحق ہونے والے افراد کے لواحقین کے غم میں برابر کے شریک ہیں۔کیلی فورنیا میں معذوروں کے مرکز پر حملہ کرکے بربریت کا بدترین مظاہرہ کیا گیا۔ انہوں نے کہا کہ دہشت گرد پوری انسانیت کے دشمن ہیں اور معصوم لوگوں کو نشانہ بنانے والے دہشت گرد کسی رعایت کے مستحق نہیں۔ آج دہشت گردی کہیں بھی ہو، دنیا کے ہر فرد کا مسئلہ ہے اور اس ناسور کے خاتمے کیلئے اقوام عالم کو مل کر عہدہ برآ ہونا ہے کیونکہ دہشت گردی اقوام عالم کا مشترکہ مسئلہ ہے اور دہشت گرد مشترکہ دشمن ہیں جن کا مل کر صفایا کرنا ہے۔ دہشت گردی چاہے کسی بھی شکل میں ہو، پاکستان اس کی مذمت کرتا ہے۔ انہوں نے کہا کہ قائداعظم محمد علی جناح کے پاکستان میں دہشت گردی اور انتہاپسندی کی کوئی گنجائش نہیں اور برداشت و میانہ روی پر مبنی پاکستانی معاشرے کا قیام ہمارا مشن ہے اور قائداعظمؒ کا یہ عظیم مقصد ضرور حاصل کریں گے۔ وزیراعلیٰ نے کہا کہ پاکستان اور امریکہ کے درمیان تعلقات کثیرالجہتی بنیادوں پر استوار ہیں اور آنے والے وقت میں پاکستان اور امریکہ کے درمیان باہمی تعلقات مزید مستحکم ہوں گے۔پاکستان اور امریکہ امن، رواداری، تحمل اور برداشت کو فروغ دینے میں ایک دوسرے کے پارٹنرز ہیں اور امن کے سفر کی تکمیل اور دہشت گردی کے خاتمے کیلئے پاکستان اور امریکہ ایک ساتھ ہیں۔ انہوں نے کہا کہ امریکہ کا پاکستان کے توانائی شعبہ میں بڑھتا ہوا تعاون لائق تحسین ہے اور امریکی کمپنی جنرل الیکٹرک کا پنجاب میں 3600 میگاواٹ کے3 گیس پاور پراجیکٹس میں شفاف بڈنگ کے ذریعے کوالیفائی کرنا خوش آئند ہے اور مستقبل میں تعاون کی نئی راہیں کھلیں گی۔ انہوں نے کہا کہ پاکستان کی معیشت تیزی سے ترقی کر رہی ہے جس کے باعث توانائی کی ضروریات میں بھی اضافہ ہو رہا ہے لہٰذا ہمیں مل کر تعاون کو مزید فروغ دینا ہے۔ انہوں نے کہا کہ قائداعظم محمد علی جناحؒ کے پاکستان میں تمام شہریوں کو برابر کے حقوق حاصل ہیں اور پاکستان کو قائداعظم محمد علی جناحؒ کے وژن کے مطابق فلاحی ریاست بنانے کیلئے پرعزم ہیں۔ معاشرے میں تحمل، رواداری اور میانہ روی کو فروغ دے کر ہی قائدؒ کے تصورات کے مطابق فلاحی ریاست قائم کی جا سکتی ہے۔ وزیراعلیٰ نے ڈیوڈ ہیل کو پاکستان میں امریکی سفیر کی ذمہ داریاں سنبھالنے پر مبارکباد بھی دی۔ امریکی سفیر ڈیوڈ ہیل نے اس موقع پر گفتگو کرتے ہوئے کہا کہ امریکہ پاکستان کے ساتھ اپنے تعلقات کو خصوصی اہمیت دیتا ہے اور پاکستان کے ساتھ مستقبل میں بھی قریبی تعاون جاری رکھیں گے۔ امریکی سفیر نے صوبہ پنجاب کے عوام کیلئے شاندار فلاحی منصوبوں کی ریکارڈ مدت میں تکمیل کے حوالے سے وزیراعلیٰ شہباز شریف کی غیر معمولی کارکردگی اور انتھک محنت کی تعریف کرتے ہوئے کہا کہ وہ انتہائی خلوص سے عوام کی خدمت کر رہے ہیں اور بلاشبہ وزیراعلیٰ شہبازشریف کی کارکردگی لائق تحسین ہے۔ امریکی سفیر ڈیوڈ ہیل نے وزیراعلیٰ پنجاب محمد شہباز شریف کو برطانیہ کے کامیاب دورے پر مبارکباد بھی دی۔ اس موقع پر لاہور میں امریکی قونصل جنرل زیچرے ہارکین رائیڈر (Mr. Zachary Harkenrider) بھی موجود تھے۔ وزیراعلیٰ پنجاب محمد شہباز شریف کی زیر صدارت اعلی سطح کا اجلاس منعقد ہوا جس میں چنیوٹ میں معدنی ذخائر کے منصوبے پر پیش رفت کا جائزہ لیا گیا۔جرمن ماہرڈاکٹر جرگن ہرتیش نے منصوبے پر اب تک ہونے والی پیش رفت کے بارے میں بریفنگ دی۔وزیر اعلی محمد شہباز شریف نے اجلاس سے خطاب کرتے ہوئے کہا کہ معدنی وسائل سے استفادہ کر کے معیشت کو فروغ دیا جا سکتا ہے ۔ محکمہ معدنیات کو جدید تقاضوں کے مطابق اپنا فعال اور موثر کردار ادا کرنا ہے ۔ محکمہ معدنیات کی تنظیم نو کے لئے اصلاحات ضروری ہیں ۔ وزیر اعلی نے ہدایت کی کہ سٹیئرنگ کمیٹی اصلاحات کے عمل کو تیز رفتاری سے آگے بڑھائے ۔صوبائی وزراء شیر علی خان، ڈاکٹر عائشہ غوث پاشا، چیف سیکرٹری ، چیئرمین منصوبہ بندی و ترقیات، سیکرٹری معدنیات اور متعلقہ حکام نے اجلاس میں شرکت کی۔وزیراعلیٰ پنجاب محمد شہباز شریف کی زیرصدارت آج یہاں اعلیٰ سطح کا اجلاس منعقد ہوا جس میں صوبے میں بلدیاتی الیکشن کے تینوں مراحل میں پاکستان مسلم لیگ (ن) کے امیدواروں کی شاندار کامیابی پر تشکر کا اظہار کیا گیا۔ وزیراعلیٰ نے مسلم لیگ (ن) کی سیاسی ٹیم کو مبارکباد دیتے ہوئے کہا کہ اللہ تعالیٰ کے بے پایاں فضل و کرم اور عوام کی والہانہ محبت سے بلدیاتی الیکشن میں بھرپور کامیابی ملی ہے اور عوام نے ووٹ کی طاقت سے وزیراعظم محمد نواز شریف کی قیادت پر مکمل اعتماد کا اظہار کیا ہے۔ انہوں نے کہا کہ بلدیاتی نتائج نے 2013 کے عام انتخابات کی شفافیت پر مہر تصدیق ثبت کر دی ہے اور بلدیاتی الیکشن کے نتائج نے ملک کی ترقی اور عوام کی خوشحالی میں رکاوٹ ڈالنے والوں کو آئینہ دکھا دیا ہے۔ وزیراعلیٰ نے کہا کہ عوام کے مینڈیٹ کی پہلے بھی لاج رکھی، آئندہ بھی رکھیں گے اور بلدیاتی اداروں کے سربراہوں کیلئے ایماندار اور خدمت کے جذبے سے سرشار امیدواروں کو آگے لایا جائے گا۔انہوں نے کہا کہ مسلم لیگ (ن) کے نومنتخب بلدیاتی امیدوار عوام کی خدمت کو اپنا شعار بنا ئیں۔ صوبائی وزراء رانا ثناء اللہ، ملک ندیم کامران، اراکین قومی اسمبلی حمزہ شہباز، پرویز ملک، سینیٹر سعود مجید، ایم پی اے منشاء اللہ بٹ، سابق ایم پی اے سمیع اللہ خان اور اعلیٰ حکام نے اجلاس میں شرکت کی۔