فلسطینیوں کے حق میں ایک اور قرار داد کی منظوری

فلسطینیوں کے حق میں ایک اور قرار داد کی منظوری

اقوام متحدہ (اے پی پی) اقوام متحدہ کی جنرل اسمبلی نے فلسطینیوں کے حق میں ایک اور قرار داد کی منظوری دے دی ہے۔فلسطینیوں کی مدد کے عنوان سے منظور کی جانے والی اس قرار داد کے حق میں جنرل اسمبلی کے 160 ارکان نے ووٹ دیئے۔ اس قرار داد میں دنیا کے ملکوں اور عالمی اداروں سے اپیل کی گئی ہے کہ وہ فلسطینی عوام کی اقتصادی اور سماجی امداد میں اضافہ کریں۔اقوام متحدہ میں فلسطین کے مستقل مندوب ریاض منصور نے قرار داد کی منظوری پر جنرل اسمبلی کے ارکان کا شکریہ ادا کرتے ہوئے فلسطینیوں کے لیے عالمی امداد میں اضافے کی ضرورت پر زور دیا ہے۔انہوں نے کہا کہ اسرائیلی قبضے اور محاصرے کی وجہ سے فلسطینیوں کو انتہائی بحرانی حالات کا سامنا کرنا پڑ رہا ہے۔اقوام متحدہ کی جنرل اسمبلی نے بدھ کے روز بھی فلسطین سے متعلق 8قرار دادوں کی منظوری دی تھی جن میں سے 4 قرار دادوں میں اسرائیل کے ہاتھوں فلسطینیوں کے حقوق کی پامالی اور غیر قانونی صیہونی بستیوں کی تعمیر کی مذمت کی گئی تھی۔

یہ قرار دادیں ایسے وقت میں منظور کی گئی ہیں جب اسرائیل نے آج تک اقوام متحدہ کی کسی بھی قرار داد پر عمل نہیں کیا ہے اور فلسطینی علاقوں میں یہودی بستیوں کی تعمیر، غزہ کا محاصرہ اور فلسطینی عوام کے قتل عام کا سلسلہ بدستورجاری ہے۔

مزید : عالمی منظر