افغانستان ، ڈرون حملے ، فورسز سے جھڑپوں میں داعش کے 12جنگجو ہلاک ، 4زخمی
کابل(آئی این پی) افغانستان میں امریکی ڈرون حملے اورافغان سیکورٹی فورسز کے ساتھ جھڑپوں میں داعش کے 12جنگجو ہلاک اور 4زخمی ہوگئے جبکہ شمالی صوبہ قندوز میں افغان نیشنل آرمی کمانڈو کور کے آپریشن میں پانچ روز کے دوران 76طالبان جنگجو ہلاک اور درجنوں زخمی ہوگئے،دوسری جانب حزب اسلامی کے سربراہ گلبدین حکمت یار نے دعویٰ کیا ہے کہ جنوب مشرقی صوبہ خوست میں انکے عوامی اجتما ع کے دوران ہونے والے دھماکے میں استعمال ہونے والا بم ایران میں تیا ر کیا گیا تھا۔پیر کو افغان میڈیا کے مطابق مشرقی صوبہ ننگرہار میں امریکی ڈرون حملے میں داعش کے 3جنگجو ہلاک ہوگئے ۔مقامی حکام کاکہنا ہے کہ ڈرون حملہ ضلع ہیسکا مینا کے علاقے میں کیا گیا ۔صوبائی پولیس کمانڈنٹ نے حملے کی تصدیق کرتے ہوئے بتایا ہے کہ آغاز میں کیے گئے ڈرون حملے میں دہشتگرد گروپ کے ٹھکانے کو نشانہ بنایا گیا۔بیان میں مزید کہاگیا ہے کہ فضائی حملے میں دہشتگرد مارے گئے ہیں جبکہ شہریوں کا کوئی نقصان نہیں ہوا۔ادھر ننگرہار صوبے میں افغان سیکورٹی فورسز کے ساتھ جھڑپوں میں داعش کوشدید جانی نقصان اٹھانا پڑا ہے ۔صوبائی حکومت کے میڈیا آفس سے جاری بیان میں کہا گیا ہے کہ ضلع کھوگیانی میں داعش جنگجو اور افغان فورسز کے درمیان اس وقت جھڑپ ہوئی جب صلیب فور آپریشن علاقے میں شروع کیا گیا۔بیا ن میں مزید کہا گیا ہے کہ جھڑپوں میں داعش کے 9جنگجو ہلاک اور 4زخمی ہوگئے جبکہ 5دیہاتوں کو عسکریت پسندوں سے پاک کرالیا گیا۔افغان سیکورٹی فورسز نے دھماکہ خیز مواد اور اسلحہ بھی اپنے قبضے میں لے لیا۔ شمالی صوبہ قندوز میں افغان نیشنل آرمی کمانڈو کور کے آپریشن میں پانچ روز کے دوران 76طالبان جنگجو ہلاک اور درجنوں زخمی ہوگئے ۔کور کے ترجمان کی طرف سے جاری بیان میں کہا گیا ہے کہ فوجی آپریشن پانچ روز قبل اما م صاحب ضلع میں شروع کیا گیا تاکہ علاقے کو عسکریت پسندوں سے پاک کیا جاسکے ۔پیر کی صبح تک آپریشن کے دوران متعدددیہاتوں کو کلیئر کرالیا گیا۔آپریشن کے دوران ایک افسر بھی مارا گیا جبکہ 2زخمی ہوئے ۔دوسری جانب حزب اسلامی کے سربراہ گلبدین حکمت یار نے دعویٰ کیا ہے کہ جنوب مشرقی صوبہ خوست میں انکے عوامی اجتما ع کے دوران ہونے والے دھماکے میں استعمال ہونے والا بم ایران میں تیا ر کیا گیا تھا۔دھماکے کے بعد حکمت یار نے پریس کانفرنس کے دوران بتایاکہ دشمن اجتماع کو روکنا چاہتا تھا لیکن بم اس وقت پھٹ گیا جب شرکاء وہاں سے چلے گئے تھے ۔مجھے معلوم ہوا ہے کہ بم ایران میں تیار کیا گیا تھا۔ہماری سیکورٹی فورسز بم کے ٹکڑوں کو تلاش کرکے ثبوت حاصل کرسکتی ہیں۔بم دھماکہ فٹ بال اسٹیڈیم کے باہر ہوا تھا جہاں حکمت یار خطاب کررہے تھے تاہم سیکورٹی فورسز کا کہنا تھاکہ دھماکہ ایک چمڑے کی دکان میں ہوا۔
افغانستان