شہدادکوٹ ،ملزمان کی اسکول میں فائرنگ،پرنسپل جاں بحق
شہدادکوٹ(خصوصی نامہ نگار)شہدادکوٹ میں نامعلوم ملزمان نے ایک نجی اسکول میں گھس کر فائرنگ کردی، جس کے نتیجے میں اسکول پرنسپل جاں بحق ہوگئے ۔افسوس ناک منگل کوواقعہ شہداد کوٹ کے علاقے تحصیل وارہ کے نجی اسکول میں پیش آیا ، جہاں نا معلوم افراد نے اسکول میں گھس کردن دہاڑے فائرنگ کردی۔فائرنگ کے نتیجے میں اسکول کے پرنسپل موقع پر ہی جاں بحق ہوگئے تاہم اور کسی شخص یا طالب علم کے زخمی ہونے کی اطلاعات موصول نہیں ہوئی ہیں۔ فائرنگ کے بعد ملزمان باآسانی فرار ہونے میں کامیاب ہوگئے۔فائرنگ سے اسکول کے طلبہ میں خوف و ہراس پھیل گیا اور طلبہ اپنی جان بچانے کے لیے ادھر ادھر بھاگتے رہے ، کچھ طلبہ اپنے بستے چھوڑ کر از خود ہی اپنے گھروں کو روانہ ہوگئے ، جبکہ بیشتر کے والدین انہیں لینے کے لیے اسکول پہنچ گئے ۔ افسوس نا کواقعے کے سبب علاقے میں خوف و ہراس پھیل گیا ہے۔پولیس نے رپورٹ درج کر کے ملزمان کی تلاش شروع کردی ہے ۔ جائے وقوعہ سے شواہد اکھٹے کرلیے ہیں۔ پولیس کی ابتدائی تحقیقات کے مطابق یہ واقعہ دہشت گردی کے بجائے ذاتی رنجش کا شاخسانہ لگتا ہے کہ حملہ آوروں نے پرنسپل کے سوا کسی کوبھی نشانہ بنانے کی کوشش نہیں کی اور اپنا کام انجام دے کر باآسانی فرار ہوگئے۔
