پاکستان میں ہمارے مندر اور عبادت گاہیں محفوظ ہیں، سہولتیں فراہم کرنے پر حکومت کے شکر گذار ہیں:شیو پرتاب بجاج
لاہور(ڈیلی پاکستان آن لائن)بھارت سے آئے ہندو یاتریوں کے جتھہ لیڈر شیو پرتاب بجاج نے کہا ہے کہ کٹاس راج ،سادھو بیلہ ہنگلاج ماتا اورکرشنا مندر سمیت پاکستان میں ہمارے مندر اور عبادت گاہیں محفوظ ہیں ،یہاں آکر یہی محسوس ہو رہا ہے کہ جسے ہم اپنے وطن اور گھر میں موجود ہیں۔
تفصیلات کے مطابق متروکہ وقف املاک بورڈ کے زیر اہتمام منعقدہ تقریب سے خطاب کرتے ہوئے ہندو یاتریوں کے جتھہ لیڈر شیو پرتاب بجاج کا کہنا تھا کہ پاکستان میں ہندو مذہب کے افراد کو ملنے والی مراعات و اقدامات قابل تعریف ہیں جس پر ہم حکومت پاکستان اورٹرسٹ بورڈ کے بہت شکر گزار ہیں ،پاکستان سے ہماری بہت سی یادیں اور تاریخ جڑی ہوئی ہے جسے ہم کبھی بھلا نہیں سکتے ۔ہندو رہنماء شیو پر تاب بجاج نے یاتریوں کی سیکیورٹی اور رہائش سمیت دیگر اعلی انتظامات پر چیئرمین بورڈ اور حکومت کا شکریہ ادا کیا ۔اس موقع پر چیئرمین بورڈ طاہر احسان نے ہندو یاتریوں کو بتایا کہ تاریخی سادھو بیلہ مندر سمیت دیگر مندروں کی گرانٹ میں خاطر خواہ اضافہ کر دیا گیا ہے ،جبکہ کٹاس راج مندر میں ترقیاتی کام تیزی سے جاری ہے۔
