سری لنکن ٹیم ہماری مہمان ہے لیکن مہمان نوازی اتنی نہیں کرنی کہ۔۔۔ تحریک انصاف کے رہنما فیصل جاوید نے قومی ٹیم کو مشورہ دیدیا

سری لنکن ٹیم ہماری مہمان ہے لیکن مہمان نوازی اتنی نہیں کرنی کہ۔۔۔ تحریک ...
سری لنکن ٹیم ہماری مہمان ہے لیکن مہمان نوازی اتنی نہیں کرنی کہ۔۔۔ تحریک انصاف کے رہنما فیصل جاوید نے قومی ٹیم کو مشورہ دیدیا

  



راولپنڈی(آئی این پی)پاکستان تحریک انصاف (پی ٹی آئی) کے رہنما سینیٹر فیصل جاوید نے قومی کرکٹ ٹیم کو سری لنکا کے خلاف ٹیسٹ سیریز کے لیے مشورہ دیا ہے کہ مہمان ٹیم کی مہمان نوازی اتنی بھی نہیں کرنی کہ وہ میچ جیت جائیں۔راولپنڈی کرکٹ اسٹیڈیم میں میڈیاسے گفتگو کرتے ہوئے سینیٹر فیصل جاوید نے کہا کہ خوشی ہے پاکستان میں دس سال بعد ٹیسٹ کرکٹ واپس آگئی ہے اور اصل کرکٹ ٹیسٹ کرکٹ ہی ہے، ٹیسٹ کرکٹ کی بحالی کے ساتھ باقی ٹیمیں بھی پاکستان آئیں گی۔انہوں نے کہا کہ سری لنکا کی ٹیم اور حکومت کا شکریہ ادا کرتے ہیں کہ وہ پاکستان آئے، سری لنکن ٹیم ہماری مہمان ہے لیکن مہمان نوازی اتنی نہیں کرنی، قومی کرکٹ ٹیم کو میچ جیتنا ہے۔ٹیسٹ کرکٹ کی بحالی پر خوشی کا اظہار کرتے ہوئے ان کا کہنا تھا کہ یہ نیا پاکستان ہے، پاکستان میں سیاح، انٹرنیشنل کرکٹرز، انویسٹرز سب آ رہے ہیں کیونکہ امن آگیا ہے۔

بعدازاں انہوں نے ٹیسٹ کرکٹ کی بحالی پر وزیر اعظم عمران خان اور چیئرمین پی سی بی احسان مانی کو داد دیتے ہوئے ویلڈن کہا۔سینیٹر فیصل جاوید کا کہنا تھا کہ پی ایس ایل پاکستان میں ہونے جا رہا ہے جس سے انٹرنیشنل کرکٹ کے دروازے پاکستان میں کھل گئے ہیں۔خیال رہے کہ حال ہی میں قومی ٹیم کی آسٹریلیا کے خلاف بدترین کارکردگی پر سابق کرکٹرز اور وزیراعظم کے معاون خصوصی نعیم الحق سمیت سینیٹر فیصل جاوید بھی پھٹ پڑے تھے۔

مزید : کھیل /علاقائی /پنجاب /راولپنڈی