شہباز شریف کا ایک مرتبہ پھر سربراہ جے یو آئی سے رابطہ، مولانا فضل الرحمان نے تحفظات سے آگاہ کردیا

لاہور (ڈیلی پاکستان آن لائن) مسلم لیگ ن کے صدر میاں محمد شہباز شریف نے 24 گھنٹوں میں دوسری مرتبہ مولانا فضل الرحمان سے ٹیلی فون رابطہ کیا ہے۔

ایکسپریس نیوز کے مطابق شہباز شریف نے سربراہ جے یو آئی سے حکومت سازی کے حوالے سے مشاورت کی جبکہ مولانا فضل الرحمان نے انتخابات پر اپنے شدید تحفظات کا اظہار کیا، انہوں نے کہاکہ انتخابات کے نتائج پر شدید تحفظات ہیں اور اس معاملے پر لائحہ عمل طے کرنے کے لیے جماعت کی مرکزی مجلس عاملہ اور صوبائی امرا و ناظمین کا اہم اجلاس طلب کر رکھا ہے،پارٹی کا اجلاس 14 فروری کو اسلام آباد میں ہوگا، جہاں انتخابی نتائج سمیت وفاق اور صوبوں میں مشترکہ حکومت سازی اور آئندہ کی مجموعی سیاسی صورت حال پر غور وخوض ہو گا۔ مولانا فضل الرحمٰن نے اپنی جماعت سے مشاورت کے لیے وقت مانگ لیا ہے۔