ایف بی آر کے چھاپے کاروباری صورتحال خراب کررہے ہیں‘ راجہ عدیل اشفاق

ایف بی آر کے چھاپے کاروباری صورتحال خراب کررہے ہیں‘ راجہ عدیل اشفاق

  

لاہور(کامرس ڈیسک) ایوانِ صنعت و تجارت لاہور کے ایگزیکٹو کمیٹی رکن راجہ عدیل اشفاق نے فیڈرل بورڈ آف ریونیو پر زور دیا ہے کہ وہ صنعتکاروں اور تاجروں کے کاروباری مقامات پر چھاپے مار کر اْن کی ساکھ خراب اور خوف و ہراس کی فضا پیدا کرنے کے بجائے سرحدوں پر چیکنگ کا نظام بہتر کرے تاکہ ملک میں سمگلنگ ممکن ہی نہ ہو، موجودہ حالات میں حکومت اور تاجروں کے درمیان بہترین تعلقات کی ضرورت ہے لیکن ایف بی آر کے چھاپے صورتحال خراب کررہے ہیں۔ ایک بیان میں راجہ عدیل اشفاق نے کہا کہ اگر چھاپے مارنے اور تاجروں کو پریشان کرنے کی روش جاری رہی تو تاجر احتجاجاً کاروبار بند کردیں گے جس سے لوگ بے روزگار ہونگے اور خود ایف بی آر کا ریونیو بہت کم ہوجائے گا۔

انہوں نے کہا کہ حکومت ملک کے معاشی مسائل ختم کرنے کے لیے بہت جدوجہد کررہی ہے جسے کامیاب بنانے کے لیے تاجروں کا تعاون بہت ضروری ہے لیکن بیوروکریسی کو اس کا کوئی احساس نہیں اور وہ حکومت و تاجروں کے درمیان تعلقات خراب کرنے پر تلی ہوئی ہے۔ راجہ عدیل اشفاق نے کہا کہ تاجر برادری جذبہ حْب الوطنی سے سرشار ہے اور حکومت کے ساتھ مل کر ملک کو معاشی ترقی کی راہ پر گامزن کرنا چاہتی ہے لیکن اس کے لیے ضروری ہے تاجروں کو بلاوجہ پریشانیوں میں مبتلا نہ کیا جائے۔ راجہ عدیل اشفاق نے وزیراعظم میاں نواز شریف اور وفاقی وزیر خزانہ اسحاق ڈار سے اپیل کی کہ وہ تاجروں کی مشکلات کا نوٹس لیں اور فیڈرل بورڈ آف ریونیو کو چھاپے مار کر تاجروں کو پریشان کرنے سے منع کریں بصورت دیگر تاجروں کے لیے کاروبار جاری رکھنا بہت مشکل ہوجائے گا۔

مزید :

کامرس -