عالمی منڈی میں تیل مہنگا ،پٹرول کی قیمت بڑھنے کا امکان
اسلام آباد(آئی این پی)پاکستان میں پٹرول اور ڈیزل کی قیمتوں میں جنوری 2025 کے دوسرے پندرہ دنوں کے دوران 3 سے 5 روپے فی لیٹر اضافے کا امکان ہے، جس کی بنیادی وجہ عالمی مارکیٹ میں تیل کی قیمتوں میں تبدیلی ہے۔میڈیا رپورٹ کے مطابق عالمی سطح پر خام تیل کی قیمتوں میں اضافے کے باعث پٹرول کی قیمتوں میں اضافے کا امکان ہے کیونکہ سپلائی میں ممکنہ رکاوٹوں اور توانائی کی بڑھتی ہوئی طلب نے عالمی منڈی میں تیل کی قیمتیں بڑھا دی ہیں۔آئل اینڈ گیس ریگولیٹری اتھارٹی (اوگرا)کی جانب سے قیمتوں میں اضافے کی سمری ارسال کی گئی ہے، جس پر حتمی فیصلہ وزیراعظم شہباز شریف اور وزارتِ خزانہ کریں گے۔برینٹ کروڈ فیوچرز کی قیمتیں 0.35فیصد اضافے کےساتھ 77.32ڈالر فی بیرل تک پہنچ گئیں، جو کہ گزشتہ تین ماہ کی بلند ترین سطح ہے۔ سردیوں کے دوران توانائی کی بڑھتی ہوئی طلب اور سپلائی میں ممکنہ رکاوٹوں کے خدشات نے تیل کی قیمتوں کو مزید بڑھا دیا ہے۔عالمی مارکیٹ میں تیل کی قیمتوں میں یہ اضافہ مسلسل تیسری ہفتہ وار بڑھوتری ہے، جو حالیہ تین سال کی کم ترین سطح سے تیزی سے اوپر آیا ہے، پاکستانی صارفین کے لیے آنے والے ہفتوں میں ایندھن کی قیمتوں میں مزید اضافے کی توقع کی جا رہی ہے۔گزشتہ ماہ حکومت نے یکم جنوری 2025 سے شروع ہونے والی پندرہ روزہ مدت کے لیے پٹرول اور ڈیزل کی قیمتوں میں اضافہ کیا تھا۔ پٹرول کی قیمت میں 0.56 روپے کا اضافہ ہوا، جس کے بعد اس کی نئی قیمت 252.66 روپے فی لیٹر ہو گئی، جبکہ ہائی اسپیڈ ڈیزل 2.96 روپے اضافے کے بعد 258.34 روپے فی لیٹر تک پہنچ گیا۔
پٹرولیم مصنوعات
