بارش سے متاثرہ دکانداروں کے نقصانات کا فوری ازالہ کیا جائے‘ مزمل صابری

بارش سے متاثرہ دکانداروں کے نقصانات کا فوری ازالہ کیا جائے‘ مزمل صابری

اسلام آباد ( کامرس ڈیسک) اسلام آباد کے بارش سے متاثرہ تاجروں کے ایک وفد نے آئی اینڈ ٹی سنٹر، جی ایٹ ون کی ٹریڈرز ویلفیئر ایسوسی ایشن کے جنرل سیکرٹری عبدالغفار چوہدری کی قیادت میں اسلام آباد چیمبر آف کامرس اینڈ انڈسٹری کا دورہ کیا اور میٹرو بس پراجیکٹ کمیٹی کے چیئرمین جناب حنیف عباسی سے مطالبہ کیا کہ وہ دکانوں میں پانی گھسنے کی وجہ سے ہونے والے نقصانات کا ازالہ کرائیں ۔ انہوں نے کہا کہ پشاور موڑ میٹرو بس سٹیشن کی تعمیر کے دوران جی ایٹ ون مارکیٹ کے نیچے سے گزرنے والا پانی کا نالہ بند ہو گیا تھا جس وجہ سے حالیہ بارش کے دوران مارکیٹ میں بہت پانی جمع ہو گیا جو دکانوں میں گھس گیا اور جس نے بہت سا تجارتی سامان بتاہ کر دیا۔ اس بنا پر انہیں بہت کاروباری نقصان ہوا ۔

تاجروں کے وفد سے خطاب کرتے ہوئے اسلام آباد چیمبر آف کامرس اینڈ انڈسٹری کے صدر مزمل حسین صابری نے میٹرو بس پراجیکٹ کمیٹی کے چیئرمین حنیف عباسی سے مطالبہ کیا کہ وہ ایک کمیٹی تشکیل دیں جو متاثرہ تاجروں کے نقصانات کا جائزہ لے تا کہ حکومت ان کے نقصانات کا مناسب ازالہ کر سکے۔

انہوں نے کہا کہ حالیہ بارشوں کی وجہ سے پشاور موڑ، سنٹارس، سیونتھ ایونیو، کچہری اور شہید ملت سمیت میٹرو بس کے بہت سے سٹیشنوں میں پانی گھس گیا جس وجہ سے مسافروں کو بھی پریشانی کا سامنا رہا۔ انہوں نے کہا کہ میٹرو بس منصوبے پر اربوں روپے لاگت آئی لیکن پانی کی نکاسی کا کوئی بہتر بندوبست نہیں کیا گیا جو بارشوں کی وجہ سے ظاہر ہو گیا ہے۔ انہوں نے اس بات پر زور دیا کہ حکومت اس اہم مسئلے کی طرف فوری توجہ دے اور تمام سٹیشنوں پر پانی کی نکاسی کے بہتر انتظامات یقینی بنائے تاکہ دکانداروں کواس بنا پا مزید نقصانات سے بچایا جا سکے اور عوام کو بھی کسی ناگہانی حادثے سے بچایا جا سکے۔

اسلام آباد چیمبر آف کامرس اینڈ انڈسٹری کے ایک وفد نے بھی متاثرہ مارکیٹ کا دورہ کیا اور متاثرہ تاجروں کے اظہار ہمدری کیا۔ وفد میں زبیر احمد ملک، ظفر بختاوری، سعید بھٹی ، نوید ملک، باسر داؤد، نثار مرزا اور بابر چوہدری شامل تھے۔

مزید : کامرس

لائیو ٹی وی نشریات دیکھنے کے لیے ویب سائٹ پر ”لائیو ٹی وی “ کے آپشن یا یہاں کلک کریں۔


loading...