مریم، بلاول کی زبان بیہود ہ، صرف پاک فوج اور پی ٹی آئی قومی ہیں: شیخ رشید

  اسلام آباد (سٹاف رپورٹر) وفاقی وزیرداخلہ شیخ رشید نے کہا ہے کہ ن لیگ اور پی پی کو آزاد کشمیر میں اپنی شکست دکھائی دے رہی ہے، مریم نواز کا لب و لہجہ انتہائی غیر ذ مہ  دارانہ ہے، بلاول کی سی وی میرے پاس ہے، پاک فوج کے پیچھے پورا پاکستان کھڑا ہے، آزاد کشمیر الیکشن میں کسی ڈبے سے ووٹ زیادہ نہیں نکلنے، صرف بلے کے ووٹ زیادہ نکلیں گے، ایک وقت آئے گا جب عمران خان کشمیر کا کیس دنیا میں لڑے گا، ایران اور پاکستان ایک بدلے ہوئے خطے میں ہیں، آج بھارت کے پاس افغانستان سے بھاگنے سے سوا کوئی چارہ نہیں، پاکستان میں صرف پی ٹی آئی اورپاک فوج قومی ہیں۔ راولپنڈی میں پریس کانفرنس کے دوران شیخ رشید نے کہا کہ ملک میں پی ٹی آئی وفاق، پنجاب، خیبر پختونخوا، بلوچستان اور گلگت بلتستان میں برسراقتدار ہے، اب جلد ہی آزاد کشمیر میں بھی تحریک انصاف کی حکومت ہوگی، ملک میں صرف دو ہی چیزیں قومی ہیں، ایک تحریک انصاف قومی جماعت ہے اور دوسری پاک فوج قومی ہے، ساری اپوزیشن جماعتیں اور قوم فوج کے ساتھ ہیں۔ قوم ملک کی سلامتی کے لیے فوج اور عمران خان کے پیچھے کھڑی ہے۔ افغانستان میں نئے طالبان جنم لے چکے ہیں یہ وہ طالبان وہ نہیں جو بندوق سے فیصلہ کرتے تھے۔ کشمیر کی انتخابی مہم میں وزیر اعظم پر کی جانے والی تنقید کے سوال پر شیخ رشید احمد نے کہا کہ مریم اور بلاول کی جماعتیں آزادکشمیر میں الیکشن ہارنے جارہی ہیں، جس کی وجہ سے وہ دھاندلی کا شورکر رہے ہیں، مریم اوربلاول بھٹو زرداری بیہودہ زبان کا استعمال کررہے ہیں، مریم نواز کالہجہ غیرذمہ دارانہ ہے۔
شیخ رشید