ایک بارش نے کراچی انتظامیہ کے کئی پول کھول دیے
کراچی ( ڈیلی پاکستان آن لائن ) کراچی کے مختلف علاقوں میں ہلکی اور تیز بارش نے شہر قائد اور شہر کی انتظامیہ دونوں کو پانی پانی کر دیا ،بارش کے باعث کراچی میں مختلف مسائل کے انبار لگ گئے
کراچی میں بارش برستے ہی سب سے پہلے ڈرین سسٹم جواب دے گئے ، شہر کی گلیاں اور سڑکیں ندی نالوں کا منظر پیش کرنے لگیں جو کہ پیدل چلنے والوں کیلئے بہت بڑی مشکل ثابت ہوئیں ۔ ادھر انتظامیہ کا کہنا ہے کہ بارش کے باعث مویشی منڈیوں کے حالات بھی خراب ہونے کی توقع ہے کراچی میں صفورا گوٹھ، گلشن اقبال، اورنگی ٹاون، صدر، گارڈن، اولڈ سٹی ایریا ،گلشن حدید، اسٹیل ٹاون، لانڈھی، ملیر، ائیرپورٹ اور دیگر علاقوں میں بارش برسی ۔
دوسرے نمبر پر ٹریفک کا نظام بھی درہم برہم ہو گیا ، ٹریفک کی روانی بری طرح متاثر ہونے سے گاڑیوں میں موجود شہری گاڑیوں میں جب کہ گلیوں میں پانی کھڑا ہونے سے گھروں میں موجود شہری گھروں میں قید ہو کر رہ گئے ۔
تیسرے نمبر پر بارش برستے ہی کے الیکٹرک کا نظام بھی دھوکہ دے گیا ، نارتھ ناظم آباد، ملیر، جامعہ ملیہ، گلشن اقبال اور گلستان جوہر کے علاقوں میں بجلی معطل ہو گئی۔
ترجمان کے الیکٹرک کے مطابق مختلف علاقوں سے بجلی بند ہونے کی اطلاعات موصول ہوئی ہیں ۔
