عمران خان کشمیر آکر اپنا وقت ضائع نہ کریں کیوںکہ ۔۔۔ مریم نواز نے وادی لیپہ جلسے میں بڑی بات کہہ دی

مظفر آباد ( ڈیلی پاکستان آن لائن ) مسلم لیگ ن کی نائب صدر مریم نواز نے وادی لیپہ میں جلسے سے خطاب کے دوران کہا  کہ عمران خان کشمیر آ کر اپنا وقت ضائع نہ کریں، آج عوامی سمندر دیکھ کر اندازہ ہو گیا ہے کہ آزاد کشمیر میں ایک بار پھر شیر آگیا ہے ۔
مریم نواز نے اپنے خطاب میں کہا کہ میں ووٹ مانگنے نہیں آئی یہاں کے لوگوں سے ملنے آئی تھی ، کشمیر کے عوام نے 25جولائی سے قبل ہی اپنا فیصلہ سنا دیا ہے ،پاکستان میں آٹا چور ، چینی چور اب آپ کے پاس بھی ووٹ مانگنے آرہے ہیں مگر آپ یاد رکھنا کہ کشمیریوں کا رزق کسی وفاقی حکومت کے ہاتھ میں نہیں بلکہ اللہ کے ہاتھ میں ہے ۔آپ عمران خان سے پوچھنا کہ پاکستان کے بعد کیا اب کشمیر کا بھی آٹا اور چینی چوری کرنے کیلئے آئے ہو ۔ 
مریم نواز نے کہا کہ ریاستی مشینری استعمال کرنے کے باوجود ڈسکہ میں ہارنے والے آپ کا ووٹ چوری کرنے پر نظریں جمائے بیٹھے ہیں ، انہوں نے ڈسکہ الیکشن میں الیکشن نہیں پورا عملہ چوری کرلیا تھا ۔راجہ فاروق حیدر اور ان کے ساتھیوں نے کسی کے سامنے بھی جھکنے اور ڈرنے سے انکار کر دیا ۔
مریم نواز نے کہا کہ خواجہ آصف ، سعد رفیق اور دیگر کے خلاف کرپشن کے الزامات لگائے گئے مگر عدالت نے سب کو مسترد کر دیا ، ان کے کرپشن کے الزامات کا بیانیہ منہ کے بل پڑا ہے ۔