ایم کیو ایم کے رکن اسمبلی پر حملے کا مقدمہ درج

ایم کیو ایم کے رکن اسمبلی پر حملے کا مقدمہ درج

کراچی(اسٹاف رپورٹر )کراچی میں ایم کیو ایم کے رکن سندھ اسمبلی جمال احمد پر حملے کا مقدمہ درج کرلیا گیاہے۔شارع نورجہاں پولیس نے رکن سندھ اسمبلی جمال احمد پر حملے کا مقدمہ درج ان کے محافظ بخت علی کی مدعیت میں درج کیا ہے۔ مقدمے میں اقدام قتل کی دفعات شامل کی گئی ہیں۔شادمان ٹاؤن میں مسلح موٹر سائیکل سوار متحدہ پاکستان کے رکن سندھ اسمبلی جمال احمد کی رہائش گاہ کے باہرعین اس وقت رکا جب وہ علاقے کے دورے پر روانہ ہورہے تھے۔سیکیورٹی اہلکار نے اسے پستول نکالتے ہوئے دیکھا تو فائرنگ کا مختصر تبادلہ بھی ہوا، جمال احمد کے محافظ نے بھی فائرنگ کی اور ملزم کا پیچھا کیا مگر وہ فرار ہوگیا۔رابطہ کمیٹی کے رکن کنور نویدجمیل نے اس حوالے سے بتایا کہ متعدد بار حکومت کو اراکین اسمبلی کو ملنے والی دھمکیوں سے آگاہ کیا، مگر کوئی کارروائی نہیں کی گئی۔

مزید : راولپنڈی صفحہ آخر