مریم نواز کی دور دراز علاقوں میں کام کرنیوالے ڈاکٹروں کیلئے سپیشل الاؤنس کی منظوری 

        مریم نواز کی دور دراز علاقوں میں کام کرنیوالے ڈاکٹروں کیلئے سپیشل ...

  IOS Dailypakistan app Android Dailypakistan app

لاہور(جنرل رپورٹر)پنجاب میں ہر شہری کو صحت کی عالمی معیار کی سہولیات فراہم کرنے کے بڑے منصوبے کا آغاز کر دیا گیا ہے۔ شہروں اور دیہات میں رہنے والے عوام کو بلاامتیاز صحت کی مساوی سہولیات کی فراہمی کیلئے وزیراعلیٰ مریم نوازشریف نے گرینڈ ہیلتھ پیکیج کا اعلان کر دیا۔ وزیر اعلیٰ مریم نوازشریف نے دور دراز علاقوں کے مراکز صحت اور ہسپتالوں میں کام کرنیوالے ڈاکٹروں کیلئے سپیشل الاؤنس دینے کی منظوری دے دی۔ وزیراعلی مریم نوازشریف کی زیرصدارت صحت عامہ پر خصوصی پلان پرتین گھنٹے طویل جائزہ اجلاس کا انعقاد کیا گیا۔پنجاب کے ہر ڈویژن میں صحت کے منصوبوں کا تفصیلی جائزہ لیا گیا۔ وزیراعلیٰ مریم نوازشریف نے مارچ 2025 ء تک صوبے کے تمام بنیادی اور دیہی مراکز صحت میں عالمی معیار کے مطابق خدمات کی فراہمی کا ٹاسک دیا  اورجون2025 ء تک پنجاب کے تمام بڑے ہسپتالوں کی تعمیر ومرمت مکمل کرنے کی ہدایت کی۔وزیر اعلیٰ پنجاب نے نواز شریف انسٹی ٹیوٹ آف کارڈیالوجی سرگودھا کی تعمیر جلد ازجلد شروع کرنے کی ہدایت کی۔ اجلاس میں بھکر میں قطری ہسپتال میں کینسر ہسپتال اور راجن پور میں بڑا ہسپتال قائم کرنے کی تجویز پربھی اتفاق کیا گیا۔ وزیر اعلیٰ مریم نوازشریف نے پنجاب انسٹی ٹیوٹ آف کارڈیالوجی کے دوسرا مرحلے کو جلد مکمل کرکے فعال بنانے کی ہدایت کی۔ اجلاس کو بریفنگ میں بتایا گیا کہ46ارب کی لاگت سے پہلے سرکاری کینسر ہسپتال کے پہلے مرحلے کی تعمیر کا آغاز کر دیا گیا ہے۔ وزیر اعلیٰ مریم نوازنے نوازشریف کینسر ہسپتال کے پہلے مرحلے میں بستروں کی تعدادکو 100 سے بڑھا 150 کرنے کی ہدایت کی۔بریفنگ میں بتایا گیا کہ ہسپتال میں کینسر کئیر کلینک،عالمی معیار کی سہولیات اور ڈاکٹر ز کے علاوہ ان کی رہائش گاہیں بھی بنائی جائیں گی جبکہ دوسرے مرحلے میں بستروں کی تعداد 280 سے بڑھائی جاسکے گی۔ مریضوں کے لواحقین کی سہولیات اور قیام کے لئے سرائے، سولر شیڈ پارکنگ اور ریستوران بھی تعمیر کیا جائے گا۔ اجلاس میں پنجاب میں پہلا بون میرو ٹرانسپلانٹ کا عالمی معیار کا خصوصی ہسپتال کے قیام کی تجویز پر بھی غورکیا گیا۔ پنجاب میں فری انسولین پروگرام کے آغاز، سملی ٹی بی ہسپتال کو جنرل ہسپتال میں تبدیل کر نے اور انجیو گرافی سروسز کی آؤٹ سورسنگ سے متعلق امور کا جائزہ لیا گیا۔ اجلاس میں ہر ضلع میں پبلک پرائیویٹ پارٹنر شپ کے تحت میڈیکل کالج قائم کرنے پر بھی غور کیا گیا،50فیصد طلبا سرکاری میرٹ پر داخل ہوں گے۔ بریفنگ میں بتایا گیا کہ مراکز صحت اور ہسپتالوں میں ادویات کی فراہمی یقینی بنائی جارہی ہے جبکہ فیلڈ ہسپتالوں میں مریضوں کی سہولت کیلئے خصوصی لفٹ نے کام شروع کردیا ہے۔ بریفنگ میں بتایا گیا کہ بنیادی اور دیہی مراکز صحت میں ڈیجیٹل ریکارڈ کیلئے ای ایم آر سسٹم کی تنصیب مکمل کر لی گئی۔۔ وزیر اعلیٰ مریم نوازشریف نے گورنمنٹ داتا دربار آئی ہسپتال کو اوقاف کے سپرد کرنے کی منظوری دی۔وزیر اعلیٰ پنجاب مریم نوازشریف نے منصو بوں کی تکمیل سے متعلق ٹائم لائن مرتب کرنے کا حکم دیا۔ مریم نواز شریف سے رکن قومی اسمبلی مسلم لیگ (ن) ملک افضل کھوکھر نے ملاقات کی جس میں لاہور ڈویلپمنٹ پلان اور سماجی بہبود سے متعلق اہم امور،ترقیاتی منصوبوں کی جلد تکمیل اور نئے منصوبوں کے بارے میں تبادلہ خیال کیا گیا- ملک افضل کھوکھر نے لاہور کے مضافات میں کلینک آن وہیل کی سروسزکو سراہا-وزیراعلی مریم نوازشریف نے اس موقع پر گفتگو کرتے ہوئے کہاکہ شہریوں کی فلاح و بہبود کیلئے مقامی سطح پر مشترکہ کوششوں کی ضرورت ہے۔ مسلم لیگ(ن) عوامی جماعت ہے اور جمہوری انداز میں عوامی مسائل حل کرنے پر یقین رکھتی ہے۔ 

مریم نواز

مزید :

صفحہ اول -