بچے بازیاب ، ماں کے حوالے کردیاگیا
لاہور(نامہ نگار)ایڈیشنل سیشن جج نے 3بچوں کی حوالگی کے حوالے سے دائر درخواست پر بچے والد سے برآمد کرواکر درخواست گزار ماں کے حوالے کردیئے ۔بچوں احاطہ عدالت میں ماں سے لپٹ کرروتے رہے ،عدالت میں سکینہ بی بی نے دائرحبس بے جا کی درخواست میں موقف اختیار کررکھا تھا کہ اس کے شوہرزاہدنے گھریلو ناچاقی پر مارپیٹ کا نشانہ بنانے کے بعد اسے گھرسے نکال دیا ہے اور زبردستی بچوں کو اپنی تحویل میں رکھا ہواہے۔
جبکہ سائلہ کوبچوں سے ملنے بھی نہیں دیا جارہا ہے ،عدالت سے استدعا ہے کہ بچوں کو ماں کے حوالے کرنے کا حکم دیا جائے ،عدالتی حکم پر متعلقہ تھانے کے ایس ایچ او نے بچوں ناصر، نعمان اور نغمہ کوعدالت کے روبرو پیش کردیا جہاں عدالت نے بچوں کو درخواست گزارماں کے حوالے کرتے ہوئے دائر حبس بے جا کی درخواست نمٹا دی ،احاطہ عدالت میں ماں سے ملتے ہی بچے اس سے لپٹ کر روتے رہے ۔
