کٹہرے میں آ ئیں، آپ یہاں پریس کانفرنس کرنے نہیں آئے،احتساب عدالت کا حمزہ شہباز پر اظہار برہمی

لاہور (ڈیلی پاکستان آن لائن) احتساب عدالت میں حمزہ شہباز کیخلاف رمضان شوگر مل کیس کی سماعت ہوئی ، عدالت نے حمزہ شہباز پر برہمی کا اظہار کرتے ہوئے ریمارکس دیئے کہ کٹہرے میں آ ئیں، آپ یہاں پریس کانفرنس کرنے نہیں آئے۔
تفصیلات کے مطابق احتساب عدالت میں رمضان شوگر مل کیس کی سماعت ہوئی ،عدالت کے باربار بلانے پر فاضل جج نے حمزہ شہباز پر برہمی کا اظہار کرتے ہوئے ریمارکس دیئے کہ کٹہرے میں آ ئیں، آپ یہاں پریس کانفرنس کرنے نہیں آئے،حمزہ شہباز نے کہا کہ آپ مجھ سے بات کیسے کر رہے ہیں ، کٹہرے میں آ رہا ہوں ،بات کرنے کا طریقہ مناسب نہیں ہے،فاضل جج کے اظہار برہمی پر ن لیگیوں کے نعرے لگائے ، فاضل جج نے ریمارکس دیئے کہ اگر آپ نے ملنا ہے تو باہر ملیں، عدالت کے وقار کو ملحوظ خاطر رکھیں ،حمزہ شہباز نے عدالت کو بتایا کہ آپ کا احترام کرتا ہوں ، میرے ساتھ کوئی بھی نہیں آیا،رش میںآتا ہوں اگر کوئی سلام دے تو شرعاً جواب دیتا ہوں ۔
عدالت نے استفسار کیا کہ شہباز شریف کہاں ہیں ، وکیل رانا مشہود نے عدالت کو بتایا کہ شہباز شریف قومی اسمبلی کے اجلاس میں شرکت کیلئے گئے ہیں،عدالت نے ریمارکس دیئے کہ آپ نے درخواست دی لیکن دستاویزات ساتھ لگائی نہیں، آئندہ ایسی غلطی نہیں ہو نی چاہیے، اسمبلی کا اجلاس کب تک جاری رہے گا؟رانا مشہود نے عدالت کو بتایا کہ اسمبلی کا اجلاس سپیکر کی صوابدید ہے، آپ نے جس طرح حمزہ شہباز کو بلایا اسم طرح تو کوئی قاتلوں کو بھی نہیں بلاتا، عدالت نے حمزہ شہباز کے جسمانی ریمانڈ میں 28نومبر تک توسیع کر دی ۔نیب نے حمزہ شہباز کے خلاف رمضان شوگر مل کیس میں ضمنی ریفرنس بھی دائر کر دیا۔