کراچی، خواتین پر حملہ کے ملزم کی گرفتاری کا انعام 10 لاکھ کر دیا گیا
کراچی(صباح نیوز) پولیس نے گلستان جوہر میں تیز دھار آلے سے خواتین پر حملہ کرنے والے ملزم کی نئی تصاویر جاری کردیں ،ملزم کی گرفتاری پر رکھی گئی انعامی رقم میں بھی100 فیصد اضافہ کرکے اسے 10 لاکھ روپے کر دیا گیا ہے۔پولیس کے مطابق ملزم کا قد 5 فٹ 7 انچ سے 5 فٹ 9 انچ تک ہے جبکہ وزن کم و بیش65 کلو ہے ۔ملزم نے ایک واردات میں نیلے رنگ کی چیک شرٹ پہنی تھی جبکہ آخری واردات میں بلیک سی ڈی 70 ماڈل کی موٹرسائیکل استعمال کی۔پولیس حکام کا کہنا ہے کہ اس سلسلے میں انعامی رقم کا اعلان کیا گیا تھا جوکہ 5 لاکھ روپے تھی، اب اسے 10 لاکھ روپے کردیا گیا ہے جبکہ وزیراعلی کی جانب سے 5 لاکھ روپے کی انعامی رقم اس کے علاوہ ہے، ملزم کی گرفتاری کے لئے بھاری نفری سادہ لباس میں تعینات ہے اور علاقے کی کڑی نگرانی کی جارہی ہے ۔حکام نے ملزم کی گرفتاری میں شہریوں سے بھی مدد کی اپیل کی ہے۔واضح رہے کہ 25 ستمبر سے 5 اکتوبر کے درمیان ملزم کے حملوں کی زد میں آکر 13خواتین زخمی ہوچکی ہیں۔
گرفتاری کا انعام