ہالی ووڈ فلم میں کام کے بعد قوی خان کی امریکہ سے واپسی

لاہور(فلم رپورٹر)سینئراداکار قوی خان امریکہ سے وطن واپس پہنچ گئے ہیں جہاں انہوں نے ایک فلم کی شوٹنگ مکمل کرائی۔قوی خان پچاس سال سے انٹرٹینمنٹ انڈسٹری سے وابستہ ہیں اور اس دوران انہوں نے ریڈیو،ٹی وی،تھیٹر اور فلموں میں بھی کام کیا لیکن ہالی ووڈ میں کام کرنے کایہ پہلا تجربہ تھا جس کے بارے میں قوی خان کا کہنا ہے کہ میں نے وہاں کام کرکے بہت کچھ سیکھا کیونکہ انسان اپنی زندگی میں ہرقدم پر کچھ نہ کچھ سیکھتا ہے۔قوی خان نے بتایا کہ انہوں نے Forbidden Steps کے عنوان سے بنائی جانے و الی فلم میں کام کیا ہے جس کی کاسٹ میں فاران طاہر،شیتل شیٹھ،نکولس ایم،گاریڈیو اور انیتا جوشی شامل ہیں۔ فلم کی ڈائریکٹر ارم پروین بلال ہیں۔
فلم میں قوی خان نے فاران طاہر کے والد کا کردار کیا ہے جو ایک مسلمان پولیس آفیسر ہے۔فاران طاہر اپنی بیٹی اور والد کے درمیان جنریشن گیپ ختم کرنے کی کوشش میں مصروف رہتا ہے۔