وفاقی کابینہ کا اجلاس 16اکتوبر کو طلب

   وفاقی کابینہ کا اجلاس 16اکتوبر کو طلب

 اسلام آباد(آئی این پی)  وزیر اعظم عمران خان نے وفاقی کابینہ کا اجلاس 16 اکتوبر کو طلب کرلیا، اجلاس میں کابینہ سے وزیر اعظم کے غیر ملکی دوروں پر مشاورت سمیت مختلف امور زیر غور آئیں گے۔تفصیلات کے مطابق وزیر اعظم عمران خان نے وفاقی کابینہ کا اجلاس 16 اکتوبر بروز بدھ کو طلب کرلیا۔ وفاقی کابینہ کے اجلاس کا 15 نکاتی ایجنڈا جاری کردیا گیا۔ذرائع کا کہنا ہے کہ کابینہ اجلاس میں وزیر اعظم دورہ چین پر کابینہ کو اعتماد میں لیں گے، وزیر اعظم کے دورہ سعودی عرب اور ایران پر بھی مشاورت کی جائے گی۔ذرائع کا کہنا ہے کہ ملکی سیاسی اور معاشی صورتحال کا جائزہ لیا جائے گا۔ کابینہ کو متروکہ وقف املاک کے اثاثہ جات پر بریفنگ دی جائے گی۔ اسلام آباد ماسٹر پلان پر بھی کابینہ کو بریفنگ دی جائے گی۔اجلاس میں کیپٹل ڈویلپمنٹ اتھارٹی (سی ڈی اے)کی تنظیم نو پر بھی کابینہ کو بریف کیا جائے گا، اجلاس میں عوامی مفادات سے متعلق اقدامات پر عملدر آمد رپورٹ کا جائزہ لیا جائے گا جبکہ اقتصادی رابطہ کمیٹی کے گزشتہ اجلاس کے فیصلوں کی توثیق کی جائے گی۔کابینہ اجلاس کے ایجنڈے میں نیشنل فرٹیلائزر مارکیٹنگ لمیٹڈ کے مینیجنگ ڈائریکٹر کی تعیناتی، اسلام آباد ہیلتھ کیئر ریگولیشن ایکٹ کے تحت بورڈ ممبران کی نامزدگی اور رئیل اسٹیٹ آرڈیننس 2019 بھی شامل ہے۔ کابینہ اجلاس میں ملک میں گندم کی صورتحال پر بھی رپورٹ پیش کی جائے گی۔

 وفاقی کابینہ

مزید : صفحہ آخر


loading...