خارجی تتر بتر ,بھاری نقصان کی اطلاعات ، اُن ہیڈ کوارٹرز کو بھی نشانہ بنایا جا رہا ہے جو داعش اور فتنہ الخوارج کو پنا ہ دیتے رہے ہیں :سیکیورٹی ذرائع
لاہور ( طیبہ بخاری سے ) پاک افغان بارڈر پر افغانستان کی جانب سے بِلا اشتعال فائرنگ کے بعد پاکستانی فورسز کی جانب سے مؤثر اور شدید جوابی کارروائی سے متعدد افغان فوجی ہلاک اور خارجی تشکیلیں تتر بتر ہو چکے ہیں ۔
سیکیورٹی ذرائع نے بتایا ہے کہ افغان پوسٹیں خارجیوں کو کور فائر دینے میں ناکام ہو گئیں ، متعدد افغان پوسٹوں اور خارجیوں کی تشکیلوں کو بھی بھاری نقصانات کی اطلاعات موصول ہو رہی ہیں ۔ انٹرم افغان حکومت کی سر پرستی میں چلنے والے افغانستان کے اندر خوارج اور داعش کے ٹھکانوں کو مؤثر طریقے سے نشانہ بنایا جا رہا ہے۔پاکستان کی جانب سے آرٹلری، ٹینکوں، ہلکے اور بھاری ہتھیاروں کا استعمال کیا جا رہا ہے،اسکے علاوہ داعش اور خارجی ٹھکانوں کو نشانہ بنانے کے لئے فضائی وسائل اور ڈرونز کا بھی استعمال کیا جا رہا ہے۔
سیکیورٹی ذرائع نے مزید بتایا کہ افغان فورسز کے اُن ہیڈ کوارٹرز کو بھی نشانہ بنایا جا رہا ہے جو داعش اور فتنہ الخوارج کو پنا ہ دیتے رہے ہیں ۔پاکستان اس وقت افغانستان میں پاک ،افغان بارڈر کے قریب، موجود خوارج اور داعش کے دہشت گرد کیمپوں اور ہائیڈ اوٹس کو بھی انتہائی مہارت سے نشانہ بنا رہا ہے، افغان فورسز کئی علاقوں سے پسپائی اختیار کر چکی ہیں، پاکستان کی طرف سے مؤثر اور شدید جوابی کارروائی جاری ہے۔
کچھ دیر قبل افغان فورسز نے پاک ،افغان بارڈر پر انگور اڈا، باجوڑ، کرم، دیر، چترال، اور بارام چاہ (بلوچستان) کے مقامات پر بِلا اشتعال فائرنگ کی تھی ، فائرنگ کا مقصد خوارج کی تشکیلوں کو بارڈر پار کروانا بھی تھا۔پاکستان فوج کی چوکس اور مستعد پوسٹوں کی جانب سے تیزی کے ساتھ بھرپور اور شدید جواب دیا گیا جو اب بھی جاری ہے۔پاک فوج نے فوری طور پر شدید رد عمل دیتے ہوئے متعدد افغانی پوسٹوں کو مؤثر طریقے سے نشانہ بنایا۔پاکستان کی بروقت کارروائی سے افغانستان کی متعدد بارڈر پوسٹیں تباہ اور درجنوں افغان فوجی اور خارجی ہلاک ہوئے،طالبان اپنی متعدد پوسٹیں چھوڑ کر بھی فرار ہوئے، لاشیں بکھری ہوئی ہیں ۔
واضح رہے کہ افغانستان کی جانب سے یہ جارحیت اُس وقت کی جا رہی ہے جب افغان وزیر خارجہ بھارت کا دورہ کر رہا ہے۔
