پاکستان کیخلاف کسی طرز کی جارحیت برداشت نہیں ،اپنے دفاع کا حق محفوظ رکھتے ہیں، شیری رحمان
اسلام آباد(ڈیلی پاکستان آن لائن)نائب صدر پیپلزپارٹی سینیٹرشیری رحمان نے افغانستان کی جانب سے پاک افغان بارڈر پر بلااشتعال فائرنگ کی شدید مذمت کرتے ہوئے کہاکہ پاک سرزمین کے خلاف کسی طرز کی جارحیت برداشت نہیں کی جائے گی،پاکستان اپنے دفاع کا حق محفوظ رکھتا ہے۔
نجی ٹی وی چینل جیو نیوز کے مطابق شیری رحمان کا اپنے بیان میں کہناتھا کہ اپنی سکیورٹی فورسز کو دشمن کے مذموم عزائم ناکام بنانے پر خراج تحسین پیش کرتی ہوں،دہشتگردوں کی نقل و حرکت روکنے کیلئے پاک فوج کی حکمت عملی قابل ستائش ہے،پاک فوج نے افغان چیک پوسٹس تباہ کرکے خارجی دہشتگردوں کو بھاری نقصان پہنچایا۔
پی پی رہنما کاکہناتھا کہ بھارت افغانستان کے ذریعے دہشتگردی سے پاکستان کو غیرمستحکم کرنا چاہتا ہے،پاکستان کسی ملک کے خلاف نہیں لیکن اپنے دفاع میں کوئی سمجھوتہ نہیں کرے گا،ان کاکہناتھا کہ پاکستان کی سلامتی پر آنچ آنے نہیں دی جائے گی،قوم اپنی افواج کے ساتھ چٹان کی طرح کھڑی ہے،ہماری سرحدوں کی حفاظت پر مامور جوان قوم کا فخر ہیں،ہماری سرحدوں کی حفاظت پر مامور جوانوں کی قربانیاں کبھی رائیگاں نہیں جائیں گی۔
شیری رحمان کاکہناتھا کہ بھارت خطے میں بدامنی پھیلانے کیلئے افغان سرزمین کو استعمال کررہا ہے،بھارتی پشت پناہی سے خارجیوں کی فائرنگ کا عالمی برادری کو بھی نوٹس لینا چاہئے،ہمیں اپنی سرزمین پرامن و سلامتی کی خاطر ہر محاذ پر مضبوطی سے کھڑے رہنا ہے،قوم متحد ہے، کسی بھی دہشتگرد حملے یا سازش کو کامیاب نہیں ہونے دیں گے۔
ان کا کہناتھا کہ بھارت افغانستان کے ذریعے دہشتگردی سے پاکستان کو غیرمستحکم کرنا چاہتا ہے،پاکستان کسی ملک کے خلاف نہیں لیکن اپنے دفاع میں کوئی سمجھوتہ نہیں کرے گا،پاکستانی عوام اور افواج نے ہر بار دہشتگردی کا ڈٹ کر مقابلہ کیا ہے،پاکستانی عوام اور افواج اب بھی ایک آواز ہیں اور ہمیشہ رہیں گے۔
