بت ہو کہ خدا میری نظر دونوں طرف ہے | احسان دانش |
بت ہو کہ خدا میری نظر دونوں طرف ہے
شاعر کو روا سجدۂ در دونوں طرف ہے
وہ جلوہ تو کیا مرا جنوں بھی نہیں محفوظ
مشکوک زمانے کی نظر دونوں طرف ہے
بخشی ہے جو تقسیم نے اخلاق کی پستی
وہ پستیِ معیارِ نظر دونوں طرف ہے
بینا ہو اگر دل تو ہیں سب دشت و چمن ایک
آنکھوں کے لیے پردۂ در دونوں طرف ہے
زہرہ کا ترانہ ہو کہ بلبل کا ترنم
وہ نغمہ زن و نغمہ نگر دونوں طرف ہے
پستی ہو ، بلندی ہو ، کسی سمت نکل جا
بے منزل و بے راہ سفر دونوں طرف ہے
جھنجھلائے ہوئے سرخ ستاروں کو سنبھالو
بگڑاہوا اندازِ سحر دونوں طرف ہے
وعدے کا تعین ہو کہ دیدار کی تقریب
ہنگامہ گہِ قلب و نظر دونوں طرف ہے
ہے دیر و حرم ایک ہی منزل کا دو راہہ
رہرو ہوں تو امکانِ خضر دونوں طرف ہے
دنیا میں بھی عقبیٰ میں بھی اے رحمتِ عالم
مخلوق تری دست نگر دونوں طرف ہے
نفرت بھی محبت کا ہے اک پہلوئے روشن
آنکھوں سے تو اوجھل ہے مگر دونوں طرف ہے
میں رہ کے نشیمن میں قفس سے نہیں غافل
صد شکر کہ پروازِسفر دونوں طرف ہے
ہیں شعلہ و گل ایک کوئی دیکھے نہ دیکھے
تنویر بہ مقدارِ نظر دونوں طرف ہے
آزاد ہوئے ، دیر و حرم میں ہے چراغاں
انسان مگرخاک بسردونوں طرف ہے
باہرنہیں خطرے سے قفس ہو کہ گلستاں
اک کشمکشِ برق و شرر دونوں طرف ہے
غم خانۂ احسان ہو یا وادیِ سینا
کوتاہی دامانِ نظر دونوں طرف ہے
شاعر: احسان دانش
(شعری مجموعہ: فصلِ سلاسل، سال اشاعت،1980)
But Ho Keh Khuda , Meri Nazar Dono Taraf Hay
Shaair Ko Rawa Sajda -e- Dar Dono Taraf Hay
Wo Jalwa To Kaya Mera Junun Bhi Nahen Mefooz
Mashkook Zamaanay Ki Nazar Dono Taraf Hay
Bakhshi Hay Jo Taqseem Nay Ekhlaaq Ki Pasti
Wo Pasti -e- Mayaar -e- Bashar Dono Taraf Hay
Beena Ho Agar Dil To Hen Sab Dasht -o- Chaman Aik
Aankhon K Liay Parda -e- Dar Dono Taraf Hay
Zohra Ka Taraana Ho Keh Bulbul Ka Tarannum
Wo Nagham Zan -o - Naghma Nagar Dono Taraf Hay
Pasti Ho , Bulandi Ho , Kisi Samt Nikal Ja
Be Manzil -o - Be Raah Safar Dono Taraf Hay
Jahnjhulaaey Huay Surkh Sitaaron Ko Sanbhaalo
Bigraa Hua Andaaz - e - Safar Dono Taraf Hay
Waaday Ka Tayyun Ho Keh Dedaar Ki Taqreeb
Hangaama Ggah -e - Qalb -o- Nazr Dono Taraf Hay
Hay Dair -o-Haram Aik Hi Manzil Ka Doraha
Rahro Hon To Imkaan -e- Khizar Dono Taraf Hay
Dunya Men Bhi Uqba Men Bhi Ay REHMAT -E - AALAM
Makhlooq Tiri Dastt -e- Nagar Dono Taraf Hay
Nafrat Bhi Muhabbat Ka Hay Ik Pehlu -e- Roshan
Aankhon Say To Ojhal Hay Magar Dono Taraf Hay
Main Reh K Nashaiman Men Qafas Say Nahen Ghaafil
Sad Shukr Keh Parwaaz -e - Nazar Dono Taraf Hay
Hen Shola -o- Gull Aik Koi Dekhay Na Dekhay
Nazar Tanveer Bamiqaadr -e - Nazar Dono Taraf Hay
Azaad Huay , Dair -o- Haram Men Hen Charaghaan
Isaan Magar Khaak Basar Dono Taraf Hay
Baahar Nahen Khatray Say Qafas Ho Keh Gulistaan
Ik Kashmakash -e- Barq -o- Sharar Dono Taraf Hay
Gham Khaana -e- EHSAN Ho Ya Waadi-e- Seena
Kohtaahi - e- Damaan -e- Nazr Dono Taraf Hay
Poet: Ehsan Danish