کامیاب جوان پروگرام کے تحت 50ہزار نوکریاں ملیں گی: حفیظ شیخ 

        کامیاب جوان پروگرام کے تحت 50ہزار نوکریاں ملیں گی: حفیظ شیخ 

  

اسلام آباد(سٹاف رپورٹر) مشیر خزانہ  ڈاکٹرعبدالحفیظ شیخ نے کہاہے کہ کامیاب جوان پروگرام کے تحت 50 ہزار کے قریب نوکریاں ملیں گی، نوجوانوں کو فراہم قرض پر سود کی شرح بھی نصف کردی گئی ہے۔ بدھ کونیوز کانفرنس سے خطاب کرتے ہوئے مشیر خزانہ حفیظ شیخ نے  کہا کہ کامیاب جوان پروگرام کے تحت مزید 7500 لوگوں کو قرض دیا جائے گا، حکومت کی پالیسی ہے لوگوں کو پیسے دے کر کاروبار میں خود مختاری دی جائے۔انہوں نے کہا کہ کامیاب جوان پروگرام کے تحت قرض کی رقم 50 لاکھ سے بڑھا کر ڈھائی کروڑ کی جائے گی، پروگرام کے لیے ہر ممکن فنڈز فراہم کررہے ہیں، 2 ہزار 900 نوجوانوں کو ایک ارب سے زائد رقم دے چکے ہیں۔مشیر خزانہ نے کہا کہ 50 لاکھ کی حد تک قرض دیا گیا ہے، نوجوانوں کو فراہم کیے گئے قرض میں شرح سود بھی کم کردی گئی ہے، چھوٹی صنعتوں اور تاجروں کی حوصلہ افزائی بڑا چیلنج ہے۔حفیظ شیخ نے کہا کہ کفایت شعاری پالیسی اپناتے ہوئے حکومتی اخراجات میں کمی کی، کرونا کے مشکل دنوں سے بھی نکلے اور معیشت کو بھی بہتر کررہے ہیں۔انہوں نے کہا کہ ہماری اسٹاک مارکیٹ میں 47 فیصد اضافہ ہوا ہے، بلومبرگ نے پاکستانی اسٹاک مارکیٹ کو دوسرے نمبر کا درجہ دیا، موڈیز نے پاکستان کی ریٹنگ مستحکم کردی جو بڑی کامیابی ہے۔

حفیظ شیخ

مزید :

صفحہ اول -