ہنڈائی نشاط نے پاکستان میں اپنی نئی گاڑی متعارف کروا دی ، قیمت کتنی ہو گی ؟ گاڑیوں کے شوقین کیلئے خوشخبری

ہنڈائی نشاط نے پاکستان میں اپنی نئی گاڑی متعارف کروا دی ، قیمت کتنی ہو گی ؟ ...
ہنڈائی نشاط نے پاکستان میں اپنی نئی گاڑی متعارف کروا دی ، قیمت کتنی ہو گی ؟ گاڑیوں کے شوقین کیلئے خوشخبری

  

لاہور (ڈیلی پاکستان آن لائن )گزشتہ کچھ عرصہ سے پاکستانی آٹو مارکیٹ میں گاڑیوں کا تیزی سے داخلہ ہو رہاہے جس کے باعث مقامی سطح پر تیار کی جانے والی گاڑیوں کے بھی فیچرز میں تیزی کے ساتھ بہتری آ رہی ہے اور مارکیٹ میںمقابلہ زیادہ ہونے کے باعث صارفین کو ایک بڑی چوائس مل جاتی ہے ۔

تفصیلات کے مطابق ہنڈائی نشاط موٹرز نے پاکستان میں ایس یو وی ٹو سان کو فروخت کے لیے پیش کردیا ہے، اس سے قبل ہنڈائی نے رواں سال فروری میں اپنی دو گاڑیاں ” سانتافے “ اور ” گرینڈ سٹاریکس “ متعارف کروائی تھی جن میں سے ساتنافے ایس یو وی ہے جبکہ دوسری چھوٹی وین ہے تاہم اب ایک مرتبہ پھر سے ہنڈائی نشاط نے اپنی ایک اور ایس یو وی ” ٹوسان “ متعارف کروا دی ہے ۔گاڑی کی قیمت 48 لاکھ 99 ہزار سے شروع ہو کر 53 لاکھ 99 ہزار تک جاتی ہے ۔

اب کمپنی کی جانب سے ایس یو وی ٹو سان کی شکل میں ایک نئی گاڑی پیش کی گئی ہے جو پہلے جون میں متعارف کرائی جانی تھی مگر کورونا وائرس کی وبا کے باعث تاخیر کا شکار ہوگئی۔

اس گاڑی کو 2 ورژن اے ڈبلیو ڈی اور ایف ڈبلیو ڈی میں متعارف کرایا جارہا ہے جس میں اے ڈبلیو ڈی کو الٹی میٹ جبکہ ایف ڈبلیو ڈی کو جی ایل ایس سپورٹ کا نام دیا گیا ہے۔دونوں ورژن میں 4 سلینڈر 16 والو 1999 سی سی پٹرول انجن دیئے گئے ہیں جو 155 ہارس پاور رکھتے ہیں جبکہ 6 اسپیڈ آٹومیٹک ٹرانسمیشن دیئے گئے ہیں۔

اندر سے اس گاڑی میں جدید ٹیکنالوجی کی مدد سے اسے خوبصورت بنانے کی کوشش کی گئی ہے جبکہ سی ڈی/ ڈی وی ڈی پلیئر کے ساتھ ایل ای ڈی ٹچ سکرین انفوٹینمنٹ سسٹم بھی موجود ہے۔مسافروں کے تحفظ کے لیے 2 ایئر بیگز دیئے گئے ہیں جبکہ 16 انچ فرنٹ اور رئیر ڈسک بریکس موجود ہیں۔ اسی طرح اے بی ایس، وہیکل اسٹیبلیٹی سسٹم، بریک اسسٹ الیکٹرونک اسٹیبلٹی کنٹرول، ہل سٹارٹ اسسٹ اور الیکٹرونک پارکنگ بریک جیسے فیچرز بھی دیئے گئے ہیں۔

دونوں میں اسٹیٹک کارنرنگ لائٹ، اے ایف ایل ایس موجود ہیں جبکہ ایل ای ڈی ہیڈلیمپس، فوگ لیمپس اور پرسنل لیمپس بھی دیئے گئے ہیں۔صارفین کیلئے گاڑی کی بکنگ کا آغاز کر دیا گیاہے جس میں ایف ڈبلیو ڈی جی ایل سپورٹ کی قیمت 48 لاکھ 99 ہزار روپے جبکہ اے ڈبلیو ڈی الٹی میٹ کی قیمت 53 لاکھ 99 ہزار روپے ہوگی۔

خیال رہے کہ ہنڈائی اس سے قبل 2004 تک پاکستان میں اپنی گاڑیاں اسمبل کرتی رہی تھی مگر اس کے مقامی اشتراک دار کمپنی فاروق موٹرز لمیٹڈ کے دیوالیہ ہونے کے بعد کورین کمپنی نے اسمبلنگ بند کردی تھی۔2017 میں ہنڈائی نے نشاط گروپ کے ساتھ شراکت داری کرتے ہوئے پاکستان میں اسمبلنگ پلانٹ کے قیام کا معاہدہ کیا تھا۔

مزید :

بزنس -