کابل میں چینی باشندوں کے ہوٹل پردھاوا بولنے والے3 حملہ آور مارے گئے
کابل (ویب ڈیسک) افغانستان میں طالبان کے زیرانتظام سیکیورٹی فورسز نے دارالحکومت کابل میں چینی شہریوں کے مشہورمسکن ہوٹل پردھاوابولنے والے3 حملہ آوروں کوہلاک کردیا ہے۔
العربیہ کے مطابق طالبان حکومت کے ترجمان ذبیح اللہ مجاہد نے کابل میں اس حملے کی تصدیق کی ہے اورکہا ہے کہ حملہ اب ختم ہوچکاہےاوراس واقعے میں کوئی غیرملکی ہلاک نہیں ہوا۔البتہ 2افراد نے حملے سے بچنے کی کوشش میں ہوٹل کی بالکونی سے چھلانگ لگا دی تھی اور وہ نیچے گرکرزخمی ہوگئے ہیں۔کابل پولیس کے ترجمان خالد زدران نے بتایا کہ مسلح افراد نے سوموار کو مقامی وقت کے مطابق دوپہر اڑھائی بجے کے قریب اس ہوٹل پرحملہ کیا تھا اور اس میں عام لوگ ٹھہرے ہوئے تھے۔
کابل میں موجود ایک صحافی کی جانب سے ٹویٹر پر پوسٹ کی گئی ایک ویڈیو میں دیکھا جا سکتا ہے کہ ایک کثیرالمنزلہ عمارت سے دھواں نکل رہا ہے اور اس کی ایک نچلی منزل میں آگ لگی ہوئی ہے۔علاقے کے مکینوں کا کہنا ہے کہ یہ حملہ ایک ایسی عمارت پر کیا گیا جہاں عام طور پرچینی اور دیگر غیر ملکی مقیم ہوتے ہیں۔انھوں نے ایک زوردار دھماکے کی آوازسننے کی اطلاع دی ہے اور بتایا کہ بعدمیں فائرنگ شروع ہوگئی تھی۔
اس حملے سے ایک روز قبل کابل میں متعیّن چین کے سفیر نے افغان نائب وزیرخارجہ سے ملاقات کی تھی اور ان سے سکیورٹی سے متعلق امورپرتبادلہ خیال کیاتھااوران سے اپنے سفارت خانے کی سیکیورٹی پرمزید توجہ دینے کی درخواست کی تھی۔چین کی سرکاری خبر رساں ایجنسی ژنہوا نے خبردی ہے کہ یہ حملہ ایک چینی گیسٹ ہاؤس کے قریب ہوا اور کابل میں اس کا سفارت خانہ صورت حال پر گہری نظر رکھے ہوئے ہے۔چینی سفارت خانہ نے فوری طور پر کوئی بیان جاری نہیں کیا تھا۔
افغانستان میں حالیہ مہینوں میں متعدد بم دھماکے ہوئے ہیں اور فائرنگ کے واقعات پیش آئے ہیں۔ان میں سے بعض کی ذمہ داری سخت گیر جنگجو گروپ داعش نے قبول کی ہے۔
