بھارت ویسٹ ایشیا بیس بال کپ میں شرکت کیلئےپاکستان آنے پر رضا مند

بھارت ویسٹ ایشیا بیس بال کپ میں شرکت کیلئےپاکستان آنے پر رضا مند

 اسلام آباد(آن لائن) بھارت نے ویسٹ ایشیا بیس بال کپ میں شرکت کی حامی بھرلی، ایونٹ 23 فروری سے اسلام آباد میں شروع ہوگا، ایران، عراق اور افغانستان کی ٹیمیں بھی پاکستان آئینگی،تفصیلات کے مطابق بیس بال فیڈریشن آف ایشیا اور پاکستانی فیڈریشن کے زیراہتمام اسلام آباد میں23 فروری سے شروع ہونے والے ویسٹ ایشیا ایونٹ کے پاکستان سے منتقل ہونے کے خدشات مکمل طور پر چھٹ چکے ہیں، پشاور میں آرمی سکول پر دہشت گردوں کے حملے کے بعد ایشین باڈی اور شریک ملکوں کے حکام سیکیورٹی کے حوالے سے کافی پریشان تھے اور انھوں نے حکومتی سطح پر کھلاڑیوں کیلیے حفاظتی انتظامات کی ضمانت مانگی تھی، وزارت بین الصوبائی رابطہ اور اسپورٹس بورڈ کی جانب سے غیرملکی آفیشلز کو ٹورنامنٹ ہر لحاظ سے کامیاب بنانے کی یقین دہانی کرائی گی۔ٹورنامنٹ میں شرکت کیلیے ایران، عراق اور افغانستان نے پہلے ہی رضامندی ظاہر کردی تھی، اب پڑوسی ملک بھارت نے بھی حامی بھر لی ہے کہ اس کے کھلاڑی اور آفیشلز پاکستان آنے کیلئے تیار ہیں۔وزارت بین الصوبائی رابطہ کے ذرائع سے معلوم ہواہے کہ بھارتی بیس بال فیڈریشن کے حکام نے یقین دلایا ہے بھارتی ٹیم اسلام آباد میں شیڈول انٹرنیشنل ایونٹ میں شرکت کریگی اس حوالے سے حکومتی سطح پر بھی اجازت مل چکی ہے۔پاکستان اسپورٹس بورڈ کے آفیشلز کا کہنا ہے کہ پاکستان اسپورٹس بورڈ ایونٹ میں شرکت کرنے والی ٹیموں کے آفیشلز سے رابطے میں ہے اور انھیں ہر طرح کے تعاون کی مکمل یقین دہانی کرائی جارہی ہے۔ ویسٹ ایشیا بیس بال کپ کے حوالے سے 16 فروری کو جنرل کونسل مٹینگ کاانعقادکیا جائے گا۔ ایونٹ کی افتتاحی تقریب میں وزیراعظم نوازشریف کومدعوکیا جائیگا۔

مزید : کھیل اور کھلاڑی