شیخ رشید اور جہانگیر ترین سے بڑا فراڈ کوئی نہیں : عابد شیر علی

شیخ رشید اور جہانگیر ترین سے بڑا فراڈ کوئی نہیں : عابد شیر علی

فیصل آباد(آئی این پی ) وزیر مملکت برائے توانائی عابد شیر علی نے کہا ہے کہ شیخ رشید اور جہانگیر ترین سے بڑا کوئی فراڈیہ نہیں ، شیخ رشید آئندہ کبھی کونسلر بھی نہیں بن سکتا،عمران خان احمقوں کی جنت میں رہتے ہیں،انصاف کے حصول کیلئے کی جانے والی کاروائیاں میرٹ پر کی جائیں،احتساب کیلئے سب کو صرف شریف خاندان ہی نظر آرہا ہے،بڑے مگر مچھ قانون کی گرفت سے باہر ہیں، ایم کیو ایم کا ڈرامہ پچھلے 25 سالوں سے چل رہا ہے۔ پیر کو فیصل آباد پیپلز کالونی میں واقع گورنمنٹ سکول کے توسیعی منصوبے کے افتتاح کے موقع پر میڈیا سے گفتگو کرتے ہوئے عابد شیر علی نے چئیرمین پی ٹی آئی کو تنقید کا نشانہ بناتے ہوئے کہا عمران خان احمقوں کی جنت میں رہتے ہیں اور آج لودھراں کے الیکشن میں بھی انہیں بدترین ناکامی کا سامنا کرنا پڑے گا۔ انہوں نے کہا نواز شریف پر لگائے گئے تمام الزامات آئندہ الیکشن میں عوام اپنے ووٹ کی طاقت سے نالہ لئی میں بہا دیں گے۔سابق صدر آصف علی زرداری کے حوالہ سے بات کرتے ہوئے عابد شیر علی نے کہا کہ سندھ پولیس زرادری ہاوس پر چھاپہ مارتے ہوئے راو انوار کو گرفتار کرے تاکہ یہ بات منظر عام پر آسکے کہ راو انوار کس کے کہنے پربے گناہ شہریوں کا قتل کرتا رہا ہے۔ انہوں نے کہا انصاف کے حصول کیلئے کی جانے والی کاروائیاں میرٹ پر کی جائیں، احتساب کیلئے سب کو صرف شریف خاندان ہی نظر آرہا ہے، اربوں روپے لوٹنے والے شرجیل میمن، زرداری کی دوست ایان علی اور جہانگیر ترین جیسے بڑے بڑے مگر مچھ قانون کی گرفت سے باہر ہیں۔عابد شیر علی نے کہا 1998میں آنے والی یو ایس ایڈ سے جہانگیر ترین نے کسانوں کی زمینیں ٹھیکے پر لیکر اربوں روپے کی کرپشن کی لیکن ان تمام معاملات پر نیب کیوں خاموش ہے۔ انہوں نے کہا کہ میاں نواز شریف نے کبھی بھی عدلیہ یا فوج کے خلاف بات نہیں کی، مارشل لالگانے والوں کے خلاف تنقید کی جاتی ہے۔ انہوں نے کہا ایم کیو ایم کا ڈرامہ پچھلے 25 سالوں سے چل رہا ہے، پہلے نمائندگی لندن سے ہوتی تھی اور اب ڈرامہ کراچی بیٹھ کر کیا جا رہا ہے۔

عابد شیر علی

مزید : صفحہ اول