پی ڈی ایم سو دن کے اندر اپنی موت آپ مرگئی،بابر اعوان 

  پی ڈی ایم سو دن کے اندر اپنی موت آپ مرگئی،بابر اعوان 

  

 اسلام آباد (این این آئی) وزیر اعظم کے مشیر برائے پارلیمانی امور بابر اعوان نے کہاہے کہ پی ڈی ایم سو دن کے اندر اپنی موت آپ مر گئی، اپوزیشن اب ایوان کی طرف دیکھے،پاکستان کے تمام آئینی اداروں کا سیاست سے کوئی تعلق نہیں، آئینی اداروں کو سیاست میں ملوث نہیں کرنا چاہیے۔ میڈیا سے گفتگو کرتے ہوئے مشیر وزیر اعظم بابر اعوان نے کہاکہ سینیٹ سے متعلق پارلیمانی معاملات پر چیئرمین سینیٹ سے گفتگو کی،سلیم مانڈوی والا کے تحفظات سے متعلق چیئرمین سینیٹ آگاہ کرینگے،معاملات سارے بہتری کی طرف جا چکے ہیں۔ انہوں نے کہاکہ ملاقات میں ڈپٹی چیئرمین نیب کے خلاف معاملہ ایوان میں حل کرنے کا فیصلہ ہوا۔ انہوں نے کہاکہ پی ڈی ایم سو دن کے اندر اپنی موت آپ مرگئی،اپوزیشن کو چاہئے کہ اب ایوان کی طرف دیکھے۔ انہوں نے کہاکہ وزیراعظم نے صاف کہا کہ گفتگو کا فورم پارلیمان ہے،یہ کہہ رہے تھے کہ ہمارے رابطے ہیں، گزشتہ ڈی جی آئی ایس پی آر نے صاف کہہ دیا کہ کسی سے کوئی رابطہ نہیں۔ انہوں نے کہاکہ پاکستان کے تمام آئینی اداروں کا سیاست سے کوئی تعلق نہیں ہے،آئینی اداروں کو سیاست میں ملوث نہیں کرنا چاہیے۔صحافی نے سوال کیاکہ مولانا نے پیزا نہ کھلانے کا شکوہ کیا آپ کیا کہیں گے؟بابر اعوان نے جواب دیاکہ مولانا سے غلطی ہوگئی وہ حلوہ کہنا چاہا رہے تھے۔

بابر اعوان 

مزید :

صفحہ آخر -