خاتون کو اغوا ءکرکے اپنی ہی قبر کھودنے پر مجبور کردیا گیا، لیکن ایسی چالاکی سے جان بچانے میں کامیاب ہوگئی کہ حیرت کی انتہا نہ رہے

واشنگٹن (ڈیلی پاکستان آن لائن) امریکی ریاست میسوری میں ایک خاتون نے اغواء اور حملے کے بعد مردہ ہونے کا ڈرامہ کر کے اپنی جان بچائی۔ خاتون میلیسا پیو نے اپنی دوست کی لاش کے نیچے چھپ کر حملہ آوروں کے جانے کا انتظار کیا اور بعد میں عدالت میں ان کے خلاف گواہی دی۔
این ڈی ٹی وی کے مطابق یہ واقعہ اگست 2020 میں پیش آیا جب میلیسا پیو اور ان کی دوست سارہ پاسکو کو گینگ کے سرغنہ گیری ہنٹر جونیئر اور اس کے ساتھیوں نے اغوا کر لیا۔ حملہ آوروں نے دونوں خواتین کو ایک سنسان علاقے میں زبردستی لے جا کر اپنی قبریں کھودنے پر مجبور کیا۔ بعد ازاں گیری ہنٹر نے سارہ پاسکو کو سر پر گولی مار کر ہلاک کر دیا اور سمجھا کہ میلیسا بھی ہلاک ہو چکی ہیں۔
میلیسا پیو نے اپنی دوست کی لاش کے نیچے چھپ کر اپنی جان بچائی اور حملہ آوروں کے جانے کے بعد کنویں سے نکل کر 911 پر کال کر کے مدد طلب کی۔ ایک ہفتے کی تفتیش کے بعد پولیس نے 9مشتبہ افراد کو گرفتار کر لیا۔ گیری ہنٹر جونیئر نے اپنے جرم کا اعتراف کرتے ہوئے 2022 میں 40 سال قید کی سزا قبول کی تاکہ سزائے موت سے بچ سکے۔ دیگر ملزمان میں شامل سٹیون چیس کالورلے کو حال ہی میں قتلِ عمد اور دیگر الزامات میں سزا سنائی گئی۔