دورہ انگلینڈآسان نہیں،عامرمیڈیاسے دوررہے،معین خان

دورہ انگلینڈآسان نہیں،عامرمیڈیاسے دوررہے،معین خان

کراچی(آئی این پی) سابق ٹیسٹ کپتان و سابق چیف سلیکٹر معین خان نے کہا ہے کہ دورۂ انگلینڈ آسان نہیں، پاکستان ٹیم کو ہم آہنگی کے ساتھ سخت محنت کرنا ہوگی، توجہ کا مرکز بننے والے فاسٹ بولر محمد عامر کو خود کو میڈیا سے دور رکھنا ہوگا۔کراچی میں میڈیا کے نمائندوں سے گفتگو کرتے ہوئے معین خان نے کہا کہ دورۂ انگلینڈ کبھی بھی آسان نہیں رہا، مصباح الحق بہترین قیادت کی بھر پور صلاحیت رکھتے ہیں تاہم ہمارے کھلاڑیوں کو اس سیریز کو آسان نہیں لینا ہوگا، پاکستانی بولنگ قدرے بہتر لیکن بیٹنگ پر توجہ کی ضرورت ہوگی، سزا ختم کرنے کے بعد محمد عامر کا سفر اسی جگہ سے شروع ہوگا جہاں رکا تھا، عامر کو انگلش میڈیا سے دور رکھنا ضروری ہے، مقامی میڈیا بات کا بتنگڑ بنانے میں دیر نہیں کرتا، انھوں نے کہا کہ پاکستان کرکٹ ٹیم کو سری لنکا سے بہتر کہا جا سکتا ہے۔معین خان نے کہاکہ پی ایس ایل کے بہتر نتائج سامنے آئے ہیں لیکن جب تک ایونٹ ملک میں نہ ہوگا غیرملکی کرکٹرز پاکستان کا رخ نہیں کریں گے، کوئٹہ گلیڈی ایٹرز کے کوچ نے کہا کہ سابق ٹی ٹوئنٹی کپتان شاہد خان آفریدی کے پشاور ز لمی کو خیرباد کہہ کر کسی اور ٹیم میں شامل ہونے کا مجھے علم نہیں تاہم ہر کسی کی خواہش ہوگی کہ آفریدی جیسا کھلاڑی اس کی ٹیم کا حصہ بنے۔

مزید : کھیل اور کھلاڑی