حکومت نے ہمارے ٹی او آرز تسلیم نہ کئے تو سڑکوں پر نکلیں گے،چپ نہیں بیٹھیں گے:عمران خان

حکومت نے ہمارے ٹی او آرز تسلیم نہ کئے تو سڑکوں پر نکلیں گے،چپ نہیں بیٹھیں ...
حکومت نے ہمارے ٹی او آرز تسلیم نہ کئے تو سڑکوں پر نکلیں گے،چپ نہیں بیٹھیں گے:عمران خان

  



کراچی (مانیٹرنگ ڈیسک)پاکستان تحریک انصاف کے چیئرمین عمران خان نے کہا ہے کہ پاناما لیکس کے معاملے پر حکومت کو عید تک موقع دیں گے۔ حکومت چاہے تو حل نکل سکتا ہے، احتجاج کا موقع نہیں آئے گا،اگر حکومت نے ہمارے ٹی او آرز تسلیم نہ کئے تو ہم پرامن احتجاج کا راستہ اختیار کرتے ہوئے سڑکوں پر نکلیں گے، ہم چپ نہیں بیٹھیں گے۔

 نجی ٹی وی چینل دنیا نیوز کے پروگرام میں کامران خان کے ساتھ گفتگو کرتے ہوئے عمران خان نے کہاکہ پاناما لیکس کے معاملے پر ایک آدمی کو بچانے کیلئے سب کچھ کیا جا رہا ہے، حکومتی کمیٹی کہتی ہے کہ ٹی او آرز سے وزیراعظم کا نام نکال دیا جائے، وزیراعظم نے کوئی غلط کام نہیں کیا تو ڈر کس بات کا ہے؟ پاناما لیکس کے معاملے پر وزیراعظم سے تحقیقات کیوں نہیں ہو سکتیں؟ ٹی او آرز کے مطابق میرا بھی احتساب کیا جائے، مجھے کسی کا ڈر نہیں ہے۔ وزیراعظم اور وزرا کے احتساب تک کرپشن ختم نہیں ہوگی۔

ان کا کہناتھا کہ ہم قرضوں میں ڈوب رہے ہیں، حکومت نے تین سال کے عرصے میں 6 ہزار ارب روپے کا قرضہ لیا، ملک چلانے کیلئے پیسہ نہیں لیکن دوسری جانب کرپشن کی انتہا ہے۔ نیب کی رپورٹ کے مطابق پاکستان میں روزانہ 12 ارب روپے کی کرپشن ہوتی ہے۔ کرپشن کی قیمت عوام کو ٹیکسوں کی صورت میں ادا کرنا پڑتی ہے۔ نیب اتنی فعال ہے تو ملک میں کرپشن اتنی کیوں بڑھتی جا رہی ہے۔

عمران خان کا کہناتھا کہ جب تک حکمرانوں اور وزیروں پر ٹیکس نہیں لگے گا یہ ملک ٹھیک نہیں ہوگا، کرپشن کی دلدل سے نہ نکلے تو پھر پاکستان کا کوئی مستقبل نہیں ہے، اگر حکومت نے ہمارے ٹی او آرز تسلیم نہ کئے تو ہم پرامن احتجاج کا راستہ اختیار کرتے ہوئے سڑکوں پر نکلیں گے، ہم چپ نہیں بیٹھیں گے۔ان کا کہنا تھا کہ حکومت چاہے تو پاناما لیکس کے معاملے کا حل نکل سکتا ہے۔ حکومت چاہے تو احتجاج کا موقع نہیں آئے گا۔ حکومت کو عید تک کا موقع دیں گے۔ کتنی دیر ملک میں طاقت ور طقبہ بچتا رہے گا۔

مزید : قومی /اہم خبریں