’’غزوۂ بدر‘‘

’’غزوۂ بدر‘‘

اک طرف کفارِ مکہ اور مسلماں اِک طرف

اک طرف ’’باطل رجز‘‘ تھا ذکرِ رحماں اِک طرف

ظلمتِ کفر اک طرف تھی، نورِ ایماں اک طرف

اک طرف تھے گرگ حیواں اور انساں اک طرف

تین سو تیرہ مجاہد اِس طرف بے ساز و برگ

تھے ہزاروں مشرکیں با سازو ساماں اک طرف

اک طرف لاکھوں خدا تھے، اک طرف توحید تھی

اک طرف ’’تعلیم باطل‘‘ ’’درسِ قرآں‘‘ اک طرف

اک طرف عتبہ و شیبہ اور بوجہل و ولید

تھے ابوبکرؓ و عمرؓ اور شیرِ یزداں اک طرف

بہہ رہا تھا اک طرف کفار کا ناپاک خوں

لا رہا تھا رنگ واں خونِ شہیداں اک طرف

پی رہے تھے اک طرف جام شہادت اہلِ حق

ہو رہے فی النار تھے مردود انساں اک طرف

ہو گیا بوجہل سا ملعون کافر قتل جب

ہوگیا برہم نظام حرب شیطاں اک طرف

بندگانِ حق پرست اس میں ہوئے چودہ شہید

اک طرف شوقِ شہادت حُورو غلماں اک طرف

اک طرف اللہ کرتا تھا فرشتوں سے مدد

اپنی ذلت پر تھے کافر سخت حیراں اک طرف

ہیبتِ اذمارمیت چھا گئی کفار پر

تھا مسلمانوں کے سَر پر ظلِ رحماں اک طرف

اک طرف کفار نے کھائی شکستِ فاش کیا

گا رہے تھے فتح کے نغمے مسلماں اک طرف

’’غازیانِ بدر‘‘ کے چہرے چمک اٹھے وہیں

مشکلیں ہوتی نظر آئیں جو آساں اک طرف

بے تحاشا بھاگتے تھے اک طرف بزول عدو

اور تعاقب کررہے تھے مردِ میداں اک طرف

کامراں اس میں فدا اللہ کا پیارا ہوا

جلوہ افگن بدر میں اسلام کا تارا ہوا

ابوالطاہر فدا حسین فدا

مزید : ایڈیشن 1