ضمنی انتخابات :سندھ میں ن لیگ کے امیدوار پی پی کے حق میں دستبردار

ضمنی انتخابات :سندھ میں ن لیگ کے امیدوار پی پی کے حق میں دستبردار

کراچی (اسٹاف رپورٹر)ضمنی انتخاب کے لیے پیپلزپارٹی کی حمایت میں مسلم لیگ نون کے تمام امیدوارباضابطہ طورپردستبردارہوگئے،پیپلز پارٹی اور مسلم لیگ ن کے رہنماں علی اکبر گجر جاوید ناگوری نے اعلان کیا ہے کہ متحدہ اپوزیشن کے فیصلے کے تحت ضمنی الیکشن میں حکومت کو ٹف ٹائم دیتے ہوئے اپوزیشن کے مشترکہ امیدوار کو کامیاب کرایءں گے۔یہ اعلان انہوں نے کراچی پریس کلب میں مشترکہ پریس کانفرنس سے خطاب کرتے ہوئے کیا۔ ضمنی انتخاب میں پاکستان پیپلز پارٹی اور مسلم لیگ ن نے ایک دوسرے کی حمایت کا فیصلہ کیا ہے۔ پیپلز پارٹی پنجاب میں مسلم لیگ ن کے امیدواروں کوجبکہ مسلم لیگ ن سندھ میں پیپلز پارٹی کے امیدواروں کی حمایت کرے گی ۔کراچی پریس کلب میں پریس کانفرنس کرتے ہوئے مسلم لیگ نون کے رہنما علی اکبرگجرکا کہنا تھا کہ تبدیلی لانے والوں نے عوام پر مہنگائی کا بم مار کر ثابت کردیا کہ وہ عوام سے کتنی مخلص ہے۔ انہوں نے کارکنان سے اپیل کی کہ وہ اپوزیشن کے مشترکہ امیدواروں کو کامیاب بنا کر جمہوریت کے فروغ اور بقا میں اپنا کردار ادا کریں ۔پیپلزپارٹی کے جاوید ناگوری نے کہاکہ نون لیگ کے ذمہ داران اور کارکنان کا شکریہ ادا کرتے ہیں ،پنجاب اور سندھ میں ہم مل کر الیکشن لڑیں گے کراچی کے عوام نے نئی حکومت کے نتائج دیکھ لیے جو اپنے اسپتال کی مثالیں دیا کرتا تھا اسے دیکھ لیا ،اسپتال تو چندے سے چل سکتا ہے مگر ملک نہیں چل سکتا ،یہ شخص ملک چلانے کے لائق نہیں ،مہنگائی عروج پر ہے۔ ہر چیز مہنگی ہوگئی ہے،جمہوریت پسند جماعتیں مل کر اب الیکشن لڑیں گی۔علی اکبر گجر نے کہاکہ ہم جمہوری جماعتیں ہیں جب بھی جمہوریت کو خطرہ ہوگا ہم مل کر جدوجہد کریں گے پیپلزپارٹی کے امیدوارقیصر نظامانی نے کہاکہ دونوں جماعتوں نے مل کر الیکشن لڑنے کا اعلان خوش آئند ہے ہمارے امیدوارضمنی انتخاب میں کامیاب ہونگے انہوں نے کہاکہ میڈیا ورکرز کو سوشل سیکورٹی میں رجسٹرڈ کیا جانا چاہیئے حکومت وقت سے اور سندھ حکومت سے درخواست ہے میڈیا ورکرز کو سوشل سیکورٹی ایکٹ میں رجسٹرڈ کیا جائے۔ ایک سوال کے جواب میں علی اکبرگجرنے کہاکہ کراچی کے تمام ضمنی الیکشن میں ہم پی پی کے حق میں دستبردار ہوگئے ہیں پنجاب میں پی پی تمام ضمنی سیٹوں پر ہمیں سپورٹ کرے گی سندھ میں تمام ضمنی الیکشن میں ہم پی پی کو سپورٹ کریں گے ہمارے دونوں حلقوں کے امیدوار پی پی کے حق میں دستبردار ہورہے ہیں نون لیگ کے تمام ذمہ داران اور کارکنان پی پی کو سپورٹ کریں گے۔

مزید : کراچی صفحہ اول