ہمارا بیانیہ جھگڑے کا نہیں، اصول کا ہے:شاہدخاقان عباسی
کراچی(ڈیلی پاکستان آن لائن)سابق وزیراعظم شاہد خاقان عباسی نے کہا ہے کہ ہمارا بیانیہ جھگڑے کا نہیں ہے بلکہ اصول کا ہے۔ عوامی رائے کا احترام نہیں ہو گا تو پھر یہی ہو گا جو آج ہو رہا ہے۔
نجی چینل ہم نیوز کے مطابق شاہدخاقان عباسی نے کراچی میں جلسے سے خطاب کرتے ہوئے کہا کہ کراچی میں امن ہو گا تو پاکستان میں امن ہوگا۔ 21سال قبال 12اکتوبر کو جمہوریت پر شب خون مارا گیا۔ جب نوازشریف حکومت میں آئے تو کراچی میں امن لوٹ آیا تھا۔ انہوںنے کہا کہ مولاناعادل خان وہ شخص تھے جو بیرون ملک سے وطن کی خدمت کے لیے آئے تھے لیکن انہیں شہید کردیا گیا۔
شاہد خاقان عباسی کا کہنا تھا کہ آج بجلی کی قیمتوں میں تین گنا اضافہ ہوا ہے۔ ان کا کہنا تھا کہ میں عمران خان کی بات نہیں کر رہا ، نظام بدلنے کی بات کررہے ہیں۔ نوازشریف کے بیانیے سے ہی ملک سے خرابی کا خاتمہ ہو گا۔ انہوں نے کہا کہ ملک سے مسائل کا خاتمہ صرف حقیقی جمہوریت میں ہی ممکن ہے,ملک کو آئین کے مطابق چلانا ہو گا۔ عوامی رائے کا احترام نہیں ہو گا تو پھر یہی ہو گا جو آج ہو رہا ہے۔`