محمد حفیظ نے بھارت میں ورلڈ کپ کے دوران پچز کی تیاری پر سوال اٹھا دیا

اسلام آباد(ڈیلی پاکستان لائن)قومی کرکٹ ٹیم کے سابق کپتان محمد حفیظ نے ورلڈکپ کے دوران پچز کی تیاری پر سوال اٹھا دیے۔

ایک پروگرام شو میں گفتگو کرتے ہوئے محمد حفیظ کا کہنا تھا کہ جمعے کو ہونے والا (نیوزی لینڈ، بنگلہ دیش) کا میچ ثابت کرےگا کہ ورلڈکپ کون کرا رہا ہے، آئی سی سی یا بی سی سی آئی۔اینکر کے پوچھنے پر حفیظ نے وضاحت کرتے ہوئے بتایا کہ  اب تک نئی دہلی، دھرم شالا اور  حیدرآباد میں 2،2 میچز ہوچکے ہیں اور  ان تینوں کے دونوں میچز میں پچ کنڈیشن ایک جیسی تھی، تاہم اگر چنئی میں نیوزی لینڈ اور  بنگلہ دیش کے درمیان ہونے والے میچ کی پچ کنڈیشن اسی گراؤنڈ میں 8 اکتوبر کو کھیلےگئے آسٹریلیا اور  بھارت  کے میچ سے مختلف رہی تو  پھر سوال ہوگا کہ یہ ٹورنامنٹ کون کروا رہا ہے؟

 محمد حفیظ کا کہنا تھا کہ ورلڈکپ آئی سی سی کا ایونٹ ہے اور اس میں کوئی اور مداخلت نہیں کرسکتا، یہ ایونٹ آئی سی سی کے اپنے کیوریٹر اور  ان کی ہدایات پر چلنا چاہیے۔خیال رہےکہ چنئی میں بھارت کے خلاف کھیلے گئے میچ میں آسٹریلیا کی پوری ٹیم 199 رن پر آؤٹ ہوگئی تھی، بھارت نے 200 رن کا ہدف 4 وکٹوں کے نقصان پر 42 ویں اوور میں پورا کرلیا تھا۔