پاکستان اور افغانستان کی جھڑپیں، چین کا بیان آگیا
بیجنگ (ڈیلی پاکستان آن لائن) چین نے پاکستان اور افغانستان کے درمیان حالیہ جھڑپوں اور کشیدہ تعلقات پر گہری تشویش کا اظہار کیا ہے۔
چینی وزارتِ خارجہ کے ترجمان کے مطابق پاکستان اور افغانستان دونوں چین کے دوست اور ایک دوسرے کے ہمسایہ ممالک ہیں، اور دونوں کا طویل المدتی اور بنیادی مفاد اسی میں ہے کہ وہ اچھے ہمسایہ تعلقات کو فروغ دیں، معاشی و سماجی ترقی کا تعاقب کریں اور دہشت گردی کے خلاف مشترکہ طور پر کام کریں۔
ترجمان نے کہا کہ چین مخلصانہ طور پر امید کرتا ہے کہ دونوں ممالک بڑے مفادات کو مدنظر رکھتے ہوئے تحمل اور بردباری کا مظاہرہ کریں، ایک دوسرے کے خدشات کو بات چیت اور مشاورت کے ذریعے حل کریں، کسی بھی قسم کی کشیدگی میں اضافے سے گریز کریں، اور خطے میں امن و استحکام کے لیے مل کر کام کریں۔
چین نے اس عزم کا اظہار بھی کیا کہ وہ پاکستان اور افغانستان کے تعلقات میں بہتری کے لیے اپنا تعمیری کردار ادا کرتا رہے گا۔
ترجمان نے مزید کہا کہ چین نے دونوں ممالک سے درخواست کی ہے کہ وہ چینی شہریوں، منصوبوں اور اداروں کی سلامتی اور تحفظ کو یقینی بنائیں۔
