نیب نے ملکی معیشت کو تباہ کردیا ہے، سلیم مانڈوی والا
اسلام آباد(ڈیلی پاکستان آن لائن ) پاکستان پیپلز پارٹی کے سینیٹر سلیم مانڈوی والا نے کہا ہے کہ نیب نے معیشت کو تباہ کردیا ہے،احتساب بیورہ بغیر کسی ثبوت کے لوگوں کو گرفتار کرلیتا ہے،لوگ اس کی وجہ سے خودکشیاں کرتے ہیں، ملک چھوڑ کر چلے جاتے ہیں۔
میڈیا سے گفتگو کرتے ہوئے سلیم مانڈوی والا کا کہنا تھا کہ نیب کی قسم کا ادارہ ہے جو پاکستان اور معیشت کو تباہ کررہا ہے، نیب نے میرے خلاف ریفرنس دائر کیا لیکن کوئی شواہد پیش نہ کر سکا،دو سال بعد ریفرنس دائر ہوا اور ابھی بھی ان کی جانب سے عدالت سے وقت مانگا جارہا ہے،نیب کا مقصد ہے کہ آپ پلی بارگین کر لیں اور عدالت نہ آنا پڑے۔
انہوں نے مزید کہا کہ کسی پارٹی کو حق نہیں کو وہ کسی پارٹی کو شوکاز نوٹس دے،پی ڈی ایم کی جانب سے پیپلز پارٹی اور اے این پی کو شوکاز نوٹس دینا غلط تھا،غلطی کرنے پر معافی مانگنی چاہیئے۔میں نہیں سمجھتا کہ اپوزیشن اتحاد ٹوٹا ہے بس کچھ اختلافات ہوئے ہیں جو دور ہوسکتے ہیں،پی ڈی ایم سربراہ مولانا فضل الرحمان کو چاہیے کہ وہ مسئلے حل کریں۔