عمران خان ہاضمہ خراب کر کے ہی دم لیں گے مگر کس کا ؟ پرویز الٰہی کا دلچسپ دعویٰ
لاہور(ڈیلی پاکستان آن لائن ) پنجاب کی وزارت اعلیٰ کیلئے حکومتی اتحاد کے امیدوار چودھری پرویز الٰہی کا کہنا ہے کہ کامیابی کیلئے پرامید ہیں، عمران خان (ن) لیگ کا ہاضمہ خراب کر کے ہی دم لیں گے۔
میڈیا سے گفتگو کرتے ہوئے سپیکر پنجاب اسمبلی اور مسلم لیگ (ق) کے رہنما چودھری پرویز الٰہی نے کہا ہے کہ میں نے وزیر اعلیٰ بن کر آپ کے لئے بہت کام کرنے ہیں، ہم کامیابی کے لئے پر امید ہیں، علیم اور حمزہ کی آپس کی لڑائی سے میرا کیا تعلق ہے؟۔
نجی ٹی وی" دنیا نیوز" کے مطابق قبل ازیں وزیر اعلیٰ پنجاب کے انتخاب کے معاملے پر نامزد امیدوار پرویز الٰہی سے سابق صوبائی وزرا اور ارکان اسمبلی نے ملاقات کی، ملاقات میں وزیر اعلیٰ کے انتخاب کے حوالے سے بات چیت اور ارکان اسمبلی سے رابطوں کے بارے میں مشاورت کی گئی۔
اس موقع پر میاں محمود الرشید نے کہا کہ ہمارے نامزد امید وار برائے وزیراعلیٰ پنجاب چودھری پرویزالٰہی انشاءاللہ واضح اکثریت سے کامیاب ہوں گے، تحریک انصاف کے یرغمال ارکان بھی وقت آنے پر ہمارے ساتھ کھڑے ہوں گے، عوام کا ردعمل سامنے آنے کے بعد (ن )لیگ کا ٹکٹ آئندہ الیکشن میں اپنی کشش کھو چکا، ہم مطالبہ کرتے ہیں کہ پنجاب میں( ن) لیگ کی ہارس ٹریڈنگ کا عدلیہ کو از خود نوٹس لینا چاہیے۔
سبطین خان نے کہا کہ انشاءاللہ (ن )لیگ کے جھوٹے دعوؤں کا پول الیکشن کے روز کھل جائے گا، عمران خان کے حق میں عوامی ردعمل دیکھ کر منحرف ارکان کی آنکھیں کھل چکی ہیں، منحرف ارکان اب نقصان کا سودا نہیں کریں گے۔
