سوشل میڈیا پر پاک فوج کو اندرونی اور بیرونی طور پر تنقید کا نشانہ بنایا جا رہا ہے ،ڈی جی آئی ایس پی آرمیجر جنرل بابر افتخار
اسلام آباد(ڈیلی پاکستان آن لائن )پاک فوج کے تعلقات عامہ کے ڈائریکٹر جنرل (ڈی جی آئی ایس پی آر)میجر جنرل بابر افتخار کا کہنا ہے کہ سوشل میڈیا پراندرونی اور بیرونی طور پر فوج کو تنقید کا نشانہ بنایا جا رہا ہے ،میڈیا کیمپئن میں لوگوں کے سیاسی خیال اور نیشنل سیکیورٹی سے متعلق خیالات کو ایک دوسرے کے سامنے پچ کر کے ان کے درمیان منفی رجحان بنایا جاتا ہے اور اسے بہت تیزی کیساتھ پھیلایا جاتا ہے اور بالخصوص ہمارے نوجوانوں میں اسے پھیلایا جاتا ہے ۔
تفصیلات کے مطابق صحافی نے سوا ل نے کیا کہ" سوشل میڈیا پر پاک فوج کو تنقید کا نشانہ بنایا جا رہا ہے اور اس میں سیاسی جماعتوں کے سوشل میڈیا سیل بھی شامل ہیں،انڈیا بھی اس میں بہت زیادہ شامل ہے اور اس کی ڈومین بھارت سے استعمال ہو رہی ہیں اس پر کیا کہیں گے ؟۔"
میجر جنرل بابر افتخار نے جواب دیا کہ جی بالکل یہ حقیقت ہے جو بھی ہو رہا ہے اسے بیرونی لنکس کے ذریعے بہت زیادہ پھیلایاجا رہا ہے ۔
بالخصوص ہمارے نوجوانوں کو ڈس انفارمیشن کے ذریعے مائل کیا جا رہا ہے ،ہمارے نوجوان طبقے کے پاس شائد اتنی معلومات نہیں ہیں کہ سٹریٹجیک طورپر کیا چل رہا ہے اور دوسرا صرف تحقیقات کیے بغیر جب ہم اس چیز کو آگے شیئر کر دیتے ہیں تو پھر یہ سب سامنے آتا ہے کہ ٹرینڈکیا کر رہا ہے؟وائرل کیا چل رہا ہے ؟۔اس کے لیے ہمیں بہت مربوط اقدامات کرنا پڑیں گے اپنی سوسائٹی کو ان اثرات سے بچانے کیلئے ،حکومتی طور پر بھی اقدامات کی ضرورت ہے اور انفرادی طور پر بھی۔
ہم نے بطور ادارہ جو اقدام کیے ہیں ان میں ہم نے اپنے آفیسرز کا مختلف سوشل میڈیا گروپس میں جانا بند کیا ہے کیوں کہ بطور فوج ہم ان تمام چیزوں کا سب سے بڑا ٹارگٹ ہیں ، ڈس انفارمیشن کے ذریعے عوام اور فوج میں تفریق کی جا رہی ہے ۔ہم نے جو جنگ لڑی ہے وہ عوام کے بل بوتے پر لڑی ہے ۔
