دو سالہ بچی کا فیس ماسک پہننے سے انکار، ماں باپ کو جہاز سے نیچے ا تار دیا گیا
نیویارک(مانیٹرنگ ڈیسک) امریکہ میں 2سالہ بچی کے فیس ماسک نہ پہننے پر اسے ماں باپ سمیت ہوائی جہاز سے اتار دیا گیا۔ میل آن لائن کے مطابق یہ واقعہ یونائیٹڈ ایئرلائنز کی پرواز میں پیش آیاجس میں الیز اوربن اور اس کا شوہر اپنی دو سالہ بیٹی ایڈیلین کے ساتھ سفر کرنے لیے سوار ہوئے۔ بچی نے فیس ماسک نہیں پہن رکھا تھا جس پر جہاز کے عملے نے الیزا اور اس کے شوہر سے کہا کہ وہ اپنی بچی کو بھی فیس ماسک پہنائیں لیکن بچی نے ماسک پہننے سے انکار کر دیا۔
رپورٹ کے مطابق ماں باپ ایڈیلین کو ماسک پہناتے اور وہ اتار کر پھینک دیتی۔ جب اس نے ماسک نہ پہنا تو یونائیٹڈ ایئرلائنز کے عملے نے ایڈیلین اور اس کے ماں باپ کو جہاز سے اتار دیا۔ الیز نے سوشل میڈیا پر ایک ویڈیو پوسٹ کی ہے جس میں جہاز کا عملہ ان کے ساتھ تلخ کلامی کر رہا ہوتا ہے اور انہیں جہاز سے اتارا جا رہا ہوتا ہے۔ الیز نے ویڈیو میں بتایا ہے کہ وہ کولوریڈو سے نیوجرسی کے شہر نیوارک جانے کے لیے پرواز میں سوار ہوئے تھے۔ جب بچی کے ماسک نہ پہننے پر انہیں سفر سے روک دیا گیا۔ یونائیٹڈ ایئرلائنز کی طرف سے اس واقعے کی تصدیق کرتے ہوئے بتایا گیا ہے کہ کورونا وائرس کی وباءکے پیش نظر ایئرلائنز کی طرف سے پابندی عائد کی گئی ہے کہ 2سال یا اس سے زائد عمر کے ہر فرد کے لیے فیس ماسک پہننا لازمی ہے۔ اسی کی خلاف ورزی پر اس میاں بیوی اور ان کی بچی کو سفر سے روکا گیا۔
