کراچی ( ڈیلی پاکستان آن لائن )کراچی بار ایسوسی ایشن کے سالانہ انتخابات کے سلسلے میں سٹی کورٹ میں پولنگ کا آغاز ہوگیا۔
کراچی بار ایسوسی ایشن کے 9999 ممبرز وکلا اپنا حق رائے دہی استعمال کریں گے، صدر،نائب صدر،جنرل سیکرٹری، جوائنٹ سیکرٹری، خزانچی اور لائبریرین کی نشستوں پر مقابلہ ہورہا ہے۔
صدارتی نشست پر عامر نواز وڑائچ ، منیر ملک، عبد الحامد یوسفی اور سید زوہیب خالد کے مابین کانٹے کا مقابلہ متوقع ہے جبکہ نائب صدر کے لیے ارشد خان،فیصل اکرام،کاظم حسین مہیسر، راحت فضل اور تاج علی شیخ امیدوار ہیں۔
جنرل سیکرٹری کی نشست پر سید اسرار شاہ، رحمان کورائی اور تابش محمود میدان میں ہیں جبکہ جوائنٹ سیکرٹری کے لئے اسد علی میمن، عمران عزیز، فدا حسین، عبدالوحید کوریجو،محبوب علی چانڈیو اور محمد باقر مہدی میں جوڑ پڑے گا۔
خزانچی کی نشست پر فرحان حبیب خان، حسیب اللہ پنہور اور کاشف نذیر بلوچ پنجہ آزمائی کرینگے جبکہ لائبریرین کے امیدواروں میں عامر علی بھٹو، فہیم علی منگی، عمران یونس اعوان اور ریاض احمد سبزوئی شامل ہیں۔
ممبر منیجنگ کمیٹی کی 11 نشستوں کے لئے 49 امیدوار میدان میں ہیں۔