لاہور(ڈیلی پاکستان آن لائن) علی ایمبرائڈری ملز کے اسد زمان اور کریسنٹ اسکول کے ابو بکر خلیل نے پنجاب ٹینس اکیڈمی، باغِ جناح لاہور میں منعقدہ علی ایمبرائڈری ملز پنجاب جونیئر ٹینس چیمپئن شپ 2024 میں بالترتیب بوائز انڈر-18 اور انڈر-16 سنگلز کے ٹائٹل جیت لیے۔
بوائز انڈر-18 کے فائنل میں نوجوان ٹینس سٹار اسد زمان نے شاندار کارکردگی کا مظاہرہ کرتے ہوئے یافع ندیم کو 8-3 کے واضح فرق سے شکست دی۔
دوسری جانب، بوائز انڈر-16 کے فائنل میں ابو بکر خلیل نے ایک دلچسپ مقابلے میں عبداللہ پیرزادہ کو 6-2 کے واضح فرق سے شکست دے کر ٹائٹل اپنے نام کیا۔ ابو بکر کی بہن خدیجہ خلیل (کریسنٹ اسکول) نے بھی شاندار کارکردگی دکھاتے ہوئے شاہنور عمر کو 6-1 کے فرق سے شکست دی اور گرلز انڈر-12 کا ٹائٹل جیت لیا۔
بوائز انڈر-14 کے فائنل میں محمد معاذ (فاطمہ گروپ) نے محمد حزیما کو 6-3 سے شکست دی جبکہ بوائز انڈر-14 ڈبلز کا ٹائٹل محمد ایان اور محمد معاذ کی جوڑی نے حاصل کیا، جنہوں نے محمد حزیما اور محمد ابراہیم حسین گل کو 4-1 سے ہرایا۔ بوائز انڈر-12 کا ٹائٹل بھی محمد ایان (فاطمہ گروپ) نے جیتا، جنہوں نے ایک سنسنی خیز مقابلے میں محمد معاذ کو 7-6 سے شکست دی۔ بوائز/گرلز انڈر-10 کے فائنل میں بھی محمد ایان نے اپنی شاندار کارکردگی جاری رکھتے ہوئے محمد ابراہیم گل کو 6-3 سے شکست دی۔
اختتامی تقریب رنگا رنگ انعامات کی تقسیم کے ساتھ منعقد ہوئی، جس میں علی ایمبرائڈری ملز کی محترمہ امبرین زمان مہمانِ خصوصی تھیں۔ انہوں نے نور زمان اطہر، پی ایل ٹی اے کے سینئر نائب صدر راشد ملک، اور کرنل (ر) آصف ڈار کے ہمراہ فاتحین اور رنرز اپ میں انعامات تقسیم کیے۔