ایسا پنجاب بنائیں گے جو دنیا کے صاف ستھرے، سرسبز اور ترقی یافتہ خطوں میں شمار ہو: وزیراعلیٰ مریم نواز

لاہور ( ڈیلی پاکستان آن لائن )وزیرِاعلیٰ پنجاب مریم نواز  نے اسلام آباد میں ترکیہ کی خاتون اول محترمہ ایمنہ اردوان سے ملاقات کی۔ وزیراعلیٰ نے ترکیہ کی خاتون اول کا پرتپاک استقبال کیا اور پاکستان آمد پر شکریہ ادا کیا۔ وزیراعلیٰ  نے پاکستان ترکیہ پارٹنر شپ برائے سسٹین ایبلٹی کے تحت سرکلر اکانومی کی تقریب میں شرکت کی۔ وزیراعلیٰ  نے معزز مہمان خاتون اول ترکیہ محترمہ ایمنہ اردوان کے ہمراہ مختلف سٹالز کا معائنہ اور سٹالز میں گہری دلچسپی کا اظہار کیا۔ وزیراعلیٰ مریم نواز نے پاکستان ترکیہ پارٹنر شپ برائے  سسٹین ایبلٹی کے تحت سرکلر اکانومی کی تقریب سے خطاب کرتے ہوئے کہا کہ ستھرا پنجاب پروگرام انتہائی اہم اور انقلابی پراجیکٹ ہے۔ستھرا پنجاب محض ایک پالیسی نہیں، بلکہ ایک عزم، ایک وژن ہے جو پنجاب کے مستقبل کو سنوارنے کے لیے ترتیب دی گیاہے۔ وزیر اعلیٰ کے عہدے کاحلف اٹھا تے ہی عزم کیا کہ صوبے کا ہر شہر اورہر گاؤں کو بین الاقوامی معیار کے مطابق صاف ستھرابنائیں گے۔

وزیراعلیٰ مریم نواز نے کہاکہ ہم دنیا کے ترقی یافتہ شہروں کی خوبصورتی اور صفائی کو دیکھ کر حیران ہوتے ہیں،پاکستان اور پنجاب کے شہری بھی اسی معیار کے مستحق ہیں۔ستھرا پنجاب پروگرام کے ذریعے صفائی اورکچرے کے مؤثر انتظام اور ماحولیاتی تحفظ میں ایک تاریخی تبدیلی لانے کا عزم کیا ہے۔ ستھرا پنجاب کے تحت ایک نئی انڈسٹری بن رہی جس سے ایک لاکھ سے زائد ملازمتوں کے مواقع پیدا ہونگے۔ ستھرا پنجاب پروگرام سے نہ صرف روزگار میں اضافہ ہوگا بلکہ پنجاب کی مقامی معیشت بھی مستحکم ہوگی۔ستھرا پنجاب منصوبے کے تحت اربوں روپے کے معاہدے کیے جا چکے ہیں، سرمایہ کاری اور معاشی ترقی کو فروغ مل رہا ہے۔ ستھرا پنجاب پروگرام کے لئے 120 ارب روپے مختص کیے گئے ہیں۔ ستھرا پنجاب میں سرمایہ کاری طویل المدتی ماحولیاتی اور معاشی فوائد فراہم کرے گی۔ پبلک پرائیویٹ پارٹنرشپ کا آغاز کیا ہے،مقامی صنعتیں اور کاروباری برادری پنجاب کے صفائی کے نظام میں کلیدی کردار ادا کریں گی۔سرکاری و نجی اشتراک سے صفائی کے شعبے میں مزید جدت، مؤثریت اور پائیداری آئے گی۔پنجاب میں روزانہ 57,000 ٹن کچرا پیدا ہوتا ہے،جو ایک چیلنج تھا، جدید ترین ٹیکنالوجی سے کامیابی سے سامنا کر رہے ہیں۔ لاہور میں ہم نے دنیا کا سب سے بڑا ڈور ٹو ڈور ویسٹ کلیکشن میکانزم متعارف کرایا ہے۔ہمارا عزم ہے کہ ڈور ٹو ڈور ویسٹ کلیکشن میکانزم کی سہولت پنجاب کے تمام شہری علاقوں تک پہنچائیں۔

وزیراعلیٰ مریم نواز نے کہا کہ دیہی علاقوں میں صفائی کے عمل کو بہتر بنانے کے لیے ہم نے ماحول دوست لوڈر رکشے اور دیگر چھوٹے مشینری یونٹس متعارف کرائے ہیں۔ لاہور میں 3ہزار سے زائد ویسٹ کلیکشن رکشے تعینات کیے گئے،صفائی کے عمل کو مزید منظم بنایا جا سکے۔ڈیجیٹل مانیٹرنگ اور شفافیت کسی بھی پراجیکٹ کی کامیابی کیلئے کلیدی کردار ادا کرتی ہے۔ ڈیجیٹل مانیٹرنگ سسٹم، مرکزی کنٹرول رومز، ڈیجیٹل حاضری کے نظام، اور شکایات کے ازالے کے پورٹل قائم کیے ہیں۔ صفائی کے عمل میں مکمل شفافیت اور بروقت نگرانی کو یقینی بنایا گیا ہے۔ہم صرف کچرا جمع نہیں کر رہے، بلکہ سمارٹ ویسٹ مینجمنٹ متعارف کروا رہے ہیں۔ سمارٹ ویسٹ مینجمنٹ سے پائیداری، سرکلر اکانومی اور گرین انڈسٹری کو فروغ دیا جارہا ہے۔

وزیراعلیٰ مریم نواز نے کہا کہ پنجاب میں پہلی مرتبہ 2 جدید لینڈفل سائٹس اور 2 مٹیریل ریکوری فیسلٹیز تعمیر کی جا رہی ہیں۔ لینڈفل سائٹس اور 2 مٹیریل ریکوری فیسلٹیزسے کچرے کو مؤثر طریقے سے ری سائیکل کیا جا سکے اور ری سائیکلنگ انڈسٹری کو فروغ دیا جا سکے۔پنجاب میں زیرو ویسٹ کا ٹارگٹ حاصل کرنے بعد بین الاقوامی شراکت داروں کے تعاون سے ویسٹ ٹو انرجی پروجیکٹس کا آغاز کریں گے۔ پائیدار صفائی کے نظام کو فروغ دے کر ہم فضائی آلودگی، ماحولیاتی آلودگی، اور بیماریوں کی روک تھام میں نمایاں بہتری لا رہے ہیں۔ ترکیہ کے ویسٹ مینجمنٹ ماڈل نے ہمیں اس ستھرا پنجاب پروگرام کی تشکیل میں بے حد مدد فراہم کی۔

وزیراعلیٰ مریم نواز نے کہا کہ محترمہ امینہ اردوان کی شکر گزار ہوں، جنہوں نے صفائی کے لئے ہمیں بین الاقوامی بہترین طریقہ کار سے روشناس کروایا۔ ترکیہ کے ویسٹ مینجمنٹ ماڈل کی بدولت ہم نے پنجاب میں جدید، مؤثر اور پائیدار صفائی کا نظام تشکیل دیا ہے۔ستھرا پنجاب پروگرام محض سڑکیں صاف کرنے کا منصوبہ نہیں،صحت کا تحفظ، معاشی استحکام اور جدید پنجاب کی تعمیر کا مشن ہے۔وزیراعلیٰ مریم نوازشریف نے کہا کہ صاف ستھرے شہر زیادہ سرمایہ کاری کو متوجہ کرتے ہیں، سیاحت کو فروغ دیتے ہیں۔تمام بین الاقوامی شراکت داروں، ماہرین اور سرمایہ کاروں کا پنجاب میں خیر مقدم کرتی ہوں۔ ہم دنیا کے بہترین تجربات، صفائی کے جدید ترین طریقوں اور پنجاب کو صفائی اور ترقی کا عالمی ماڈل بنانے کیلئے پرعزم ہیں۔ ایسا پنجاب بنائیں گے جو دنیا کے صاف ستھرے، سرسبز اور ترقی یافتہ خطوں میں شمار ہو۔