پی ایس ایل،احسان مانی کی زیرصدارت اہم اجلاس آج ہوگا

پی ایس ایل،احسان مانی کی زیرصدارت اہم اجلاس آج ہوگا

لاہور(سپورٹس رپورٹر)پاکستان سپر لیگ(پی ایس ایل )کی گورننگ کونسل کا اہم اجلاس (آج)پیر کو لاہور میں ہوگا ،پروڈکشن کے اخراجات میں اضافے ،آمدنی میں پی سی بی کے حصے اور ٹیکس سمیت کئی معاملات زیرغور آئیں گے۔ تفصیلات کے مطابق پی ایس ایل گورننگ کونسل کی میٹنگ پیر کو چیئرمین پی سی بی احسان مانی کی زیرصدارت ہوگی، اس موقع پر کئی اہم امور پر تبادلہ خیال ہونا ہے، فرنچائز مالکان بعض معاملات پر بورڈ حکام سے جلے بھنے بیٹھے ہیں، سب سے نیا تنازع پروڈکشن اخراجات کا ہے، پاکستان کرکٹ بورڈ نے گزشتہ عرصے 12 ملین ڈالر سالانہ کے عوض تین سالہ براڈ کاسٹنگ رائٹس کا معاہدہ کیا تھا، مگر پھر فرنچائزز کو یہ اطلاع بھی دی کہ پروڈکشن اخراجات کی رقم بڑھ کر 5.1ملین ڈالر ہو گئی ہے،اس پر اونرز نے سخت احتجاج کیا کہ اگر اتنی بڑی رقم منہا ہو گئی تو ان کو کیا حصہ ملے گا؟انھوں نے پی سی بی سے مطالبہ کیا کہ وہ خود یہ اخراجات برداشت کرے، اب اس حوالے سے گرماگرم بحث ہونی ہے،حکام نے ٹیم مالکان کو بتایا تھاکہ اگلے ایڈیشن کیلئے وینیوز کی تعداد بڑھ چکی، پاکستان میں زیادہ میچز ہوں گے جبکہ یو اے ای میں ابوظبی کا بھی اضافہ ہو گیا، اس لیے پروڈکشن اخراجات بھی بڑھ گئے ہیں، اس بار کوریج کیلیے زیادہ کیمرے بھی استعمال ہوں گے۔اونرز بورڈ سے ایک بار پھر یہ مطالبہ کریں گے کہ وہ سپانسر شپ معاہدوں سے اپنا 50 فیصد شیئر کم کرے، ٹیکس میں چھوٹ کا معاملہ بھی زیرغور آئے گا، اس سلسلے میں 2فرنچائز اونرز پر مشتمل کمیٹی تشکیل دی گئی تھی جس نے اعلی حکومتی شخصیات سے ملاقات بھی کی تاہم تاحال کوئی فیصلہ سامنے نہیں آیا ہے۔ یاد رہے کہ پی ایس ایل کے چوتھے ایڈیشن کا آغاز 14 فروری کو ہوگا۔

مزید : کھیل اور کھلاڑی