چیف ایگز یکٹو لیسکوکی آن لائن کچہری، شکایات فوری نمٹانے کے احکامات 

چیف ایگز یکٹو لیسکوکی آن لائن کچہری، شکایات فوری نمٹانے کے احکامات 

  

  

لاہور(سٹی رپورٹر)چیف ایگزیکٹو لیسکو چوہدری محمد امین نے گزشتہ روز لیسکو ہیڈ کوارٹر میں فیس بک کے لائیو سیشن کے ذریعے صارفین کی شکایات سْنیں اور شکایات کے فی الفور ازالے کے لئے موقع پر ہی احکامات جاری کئے۔ لیسکو کی خصوصی ای کچہری میں جنرل منیجر آپریشن پرویز اقبال، ڈائریکٹر جنرل ایڈمن میاں افضل، ڈائریکٹر ایچ آر آضیہ شعیب، چیف انجینئر آپریشن محمد نعیم، چیف فنانس آفیسربشریٰ عمران، پراجیکٹ ڈائریکٹر کنسٹرکشن عبدالمنان منگی اور چیف انجینئر میٹریل مینجمنٹ شاہد محمود بھی موجود تھے جبکہ تمام آپریشن سرکلز کے ایس ایز نے بھی آن لائن فیس بک سیشن میں شرکت کی۔لیسکو کی جانب سے خصوصی طور پر منعقد کی جانے والی اس ہفتہ وار ای کچہری میں ریجن کے تمام سرکلز میں رہائش پذیر صارفین بھی اپنے مسائل کے بروقت حل کے لئے بھرپور شرکت کرتے ہیں۔گزشتہ روز منعقد ہونے والی لیسکو کی ای-کچہری میں مختلف نوعیت کی تقریباً 80 شکایات موصول ہوئیں جن میں بجلی بلوں کی اقساط، ہائی وولٹیج تاروں کی منتقلی، ٹرانسفارمر اپ گریڈیشن، بل درستگی،بکٹ ٹرالیاں،ٹرانسفارمرز کی دستیابی،ٹیوب ویل کنکشنز، میٹر منقطع ہونے اور میٹر نہ لگنے سے متعلق شکایات شامل ہیں۔چیف ایگزیکٹو لیسکو چوہدری محمد امین نے موصول شدہ شکایات پر متعلقہ افسران کو فی الفور ہدایات جاری کیں۔ان کا کہنا تھا کہ صارفین کی شکایات کے ازالے کو مکمل طور پر یقینی بنایا جائے۔واضح رہے کہ یہ ای کچہریاں وزیراعظم پاکستان اور وزارت توانائی کی خصوصی ہدایات پر شروع کی گئی ہیں۔ جن کا مقصد ملک بھر میں پھیلی کورونا وائرس کی وبائکو مدِ نظر رکھتے ہوئے عوامی شکایات کا ان کے گھر کی دہلیز پر ہی ازالہ کیا جانا ہے۔ اسی تناظر میں لیسکو چیف اپنی ٹیم کے ہمراہ ہفتہ وار بنیاد پر اپنے فیس بک پیج LESCO PMDU کے ذریعے عوام کی شکایات وصول کرتے ہیں جن کے فی الفور ازالے کو ہر ممکن طور پر یقینی بنایا جاتا ہے۔ لیسکو صارفین کی جانب سے ای کچہریوں کے انعقاد کو خوش آئند قرار دیتے ہوئے اس امید کا اظہار کیا گیا ہے کہ وباء کے دوران لیسکو کی جانب سے اٹھائے گئے اس طرح کے مثبت اقدامات سے صارفین بجلی کو مزید ریلیف حاصل ہو گا۔

مزید :

میٹروپولیٹن 1 -