سشانت سنگھ کی خود کشی کا ایک مہینہ مکمل، گرل فرینڈ ریا چکروتی نے خاموشی توڑ دی، ایسی بات کہہ دی کہ آنکھوں میں آنسو آجائیں
ممبئی (ڈیلی پاکستان آن لائن) بالی ووڈ اداکار سشانت سنگھ راجپوت کی خود کشی کو ایک مہینہ گزرنے پر ان کی گرل فرینڈ ریا چکروتی نے خاموشی توڑ دی اور انتہائی جذباتی پوسٹ کرکے اپنے احساسات کا اظہار کیا ہے۔
ریا چکروتی نے لکھا ابھی تک اپنے احساسات کا مقابلہ کرنے کی تگ و دو میں مصروف ہوں، تم وہ شخص ہو جس نے مجھے پیار کی طاقت پر یقین کرنا سکھایا، میں یقین کے ساتھ کہہ سکتی ہوں کہ میں نے ہر دن تم سے کچھ نہ کچھ سیکھا، مجھے اس بات کا کبھی یقین نہیں آئے گا کہ تم اب یہاں نہیں ہو۔ مجھے پتا ہے تم اب بہت ہی پرسکون جگہ پر ہو، چاند، ستارے، کہکشاؤں نے کھلے ہاتھوں کے ساتھ سب سے بڑے طبیعات دان کو خوش آمدید کہا ہوگا۔ میں ٹوٹتے تارے کو دیکھ کر تمہارے لوٹ آنے کی دعا کروں گی۔
تم میں وہ سب تھا جو کسی خوبصورت شخص میں ہوسکتا ہے، میرے الفاظ اس پیار کو بیان نہیں کرسکتے جو ہم دونوں میں تھا، میرا خیال ہے جب تم نے کہا تھا کہ یہ ہم دونوں کی سوچ سے پرے ہے تو یہ تم حقیقت میں کہہ رہے تھے۔
تم نے کھلے دل کے ساتھ ہر چیز سے پیار کیا، تم نے مجھے دکھایا کہ ہمارا پیار توضیحی ہے۔ آج تمہیں کھوئے ہوئے 30 دن ہوگئے ہیں لیکن تمہیں پیار کرنے کو پوری زندگی پڑی ہے۔
خیال رہے کہ بالی ووڈ اداکار سشانت سنگھ راجپوت نے 14 جون کو ممبئی میں خود کشی کرلی تھی، ان کی خود کشی کے بعد یہ پہلا موقع ہے جب ریا چکروتی نے اس حوالے سے بات کی ہے۔